Home Saude Deskonfia 50 Resin Iha Quelikai Mate Ho COVID, Domingos: Maioria Mate Tanba...

Deskonfia 50 Resin Iha Quelikai Mate Ho COVID, Domingos: Maioria Mate Tanba Susar Dada iis.

2425
0
rai Quelicai. [Foto: copyright google | 17.05.2021]

Reportajen Joselina dos Santos

“Iha sinál balun ne’ebé bele deskonfia tanba sira mate ne’e maioria la simu vasina, no infomasaun ne’ebé Sentru Saúde sira  hetan katak maioria mate tanba difisil atu dada iis”. Xefe Sentru Saude Quelicai

Autoridade Administradór Postu-Administrativu Quelikai, Munisípiu Baucau deskonfia ho ema nain 50 resin ne’ebe mate iha postu-administrativu Kelikai hahu husi loron 6 Setembru to’o ohin loron, mate ho COVID-19, tanba maioria idozu no seidauk simu vasina  

Tuir informasaun ne’ebé Neon Metin asesu husi Autoridade Administradór Postu-Administrativu Quelikai Munisipiu Baucau, Sebastião P. G. Pires katak iha Postu-Administrativu Kelikai hamutuk Suku 15, maibé Suku iha suku 14 mak ema mate tutuir malu husi loron 6 Setembru to’o ohin loron hamutuk ema na’in 50 resin no suku ida de’it maka mate laiha.

Administradór ne’e hatutan, sira ko’alia ona oinsá komunidade sira atu bele prevene-an, mak ida-idak tenke kuidadu sira nia saúde, maski lockdown laiha ona, ida-idak tenke prevene-an atu nune’e labele hetan moras COVID-19.

Autoridade Administradór Postu-Administrativu Quelicai Munisipiu Baucau, Sebastião P. G. Pires. [Foto: Joselina | 16.09.2021]

“Dadaun ne’e ami hala’o hela sosializasaun oinsa komunidade sira bele simu vasina hodi prevene aan husi covid-19, maibé katuas ferik sira tensaun sa’e maka’as entaun sira susar atu simu vasina,” hateten Autoridade Administradór Postu-Administrativu Kelikai, via telefone ba Neon Metin, 16/09.

Autoridade Administradór ne’e hateten tan ba Neon Metin katak, lolos ne’e komunidade sira tenke vasina, maibe maioria terseira idade hotu, entaun susar ba autoridade lokál sira atu konvense, maibe  nafatin fo hatene nafatin komunidade sira bele kontrola sira nia-an, karik sente moras  ba Sentru Saúde ne’ebé , hodi bele halo swab test ka bele hetan entendimentu husi Saúde.

“Ami deskonfia de’it tanba iha situasaun covid-19 nia laran, só ema ne’ebé toma konta ba moras ida ne’e mak bele deteta, tanba orsida ita dehan covid-19 mos ladun loos, tanba ne’e mak husu ba Ministeriu Saude hodi nune’e bele mai deteta moras ne’ebé dadaun afetadu,” hateten Sebastião

Iha parte seluk Xefi Suku Laisorolai Debaixo, Julio Farkhus Pinto hatetetn relasiona ho virus COVID-19 sientista ho doutór sira mak bele deteta, ita deskonfia de’it tanba hahú husi loron 1 Setembru até ohin loron ne’e komunidade lubuk ida mak mate husi suku 6 no konta hamutuk Postu-Administrativu Quelikai tomak hamutuk ema na’in 50 resin mak mate.

Nia dehan loron hirak nia laran ema mate tuituir malu no iha ema mate grave na’in rua.

“Parte relevante tenke urjentemente bele atende tanba komunidade sira iha ne’e nunka mais prevene-an no maioria idozu idade 60 ba leten mak mate barak”, dehan Julio ba Neon Metin via telefone

Xefi Suku ne’e apela ba komunidade sira katak atu prevene-an iha ida-idak nia rezidénsia, tenke minimu tuir protokolu Organizasaun Mundial Saude nian.

Iha sorin seluk, Xefe Sentru Saúde Quelicai, Domingos Boavida haktuir mate sira ne’e mate tanba covid ka mate tanba moras sira seuk,  ladún hatene 100% tanba sira la halo swab test, maibé iha sinál balun ne’ebé bele deskonfia tanba sira mate ne’e maioria la simu vasina, no infomasaun ne’ebé Sentru Saúde sira  hetan katak maioria mate tanba difisil atu dada iis.

“Maneira ne’ebé ami uza maka ami halo koordenasaun ho liu-liu Administradór no Autoridade Lokál sira, hamutuk atu buka solusaun, tanba Saúde mesak labele tanba ami ba Test Swab mak ema la fó-an ba ami, entaun ne’e bele difikulta, tanba ne’e dalan di’ak mak tenke liu husi autoridade lokál sira,” dehan Domingos

Print Friendly, PDF & Email

LEAVE A REPLY

Please enter your comment!
Please enter your name here