Husi Empresta $1.00 Hodi Suku Ema nia Sapatu, Ohin Loron Jose Bele Hetan $100 Resin

Reportajen Francisco JDA

“Suku sapatu ne’e foin fulan rua, loron ida bele kaer $106, maibe sorte la iha kada loron bele hetan deit $15.00”, Jose

Moris hanesan ema ho defisiénsia la’os barreira atu ba buka moris no partisipa iha atividade, moris ho defisiénsia mós iha ezijénsia ne’ebé presiza halo, atu la hamosu dependénsia.

Neon Metin dadalia ho Jose de Arauju moris nu’udar defisiénsia ain, mai husi Munisípiu Ainaro, Suku Manu-Taci, oan dalima hosi maun alin nain ne’en. Jose haktuir bainhira nia idade tinan ida, nia hetan moras nune’e inan aman lori ba sona ho aimoruk, ikus mai Jose tenke moris ho defisiénsia no tur iha kadera roda

Bainhir Jose hahú moris hanesan defisiénsia , nia inan aman la autoriza atu ba eskola, no husu nia hein deit uma. Situasaun ne’e halo Jose sente lakon nia liberdade tanba labele foti desizaun hodi hatutan nia moris, nune’e Jose deside sai husi Ainaro ho subar deit, sem hatene husi nia inan aman, no deside hela iha koléjiu Aileu  

 “Ha’u moris mai ema la ho defisiénsia, bainhira hetan moras, lori ba sona mak hau sai defisiénsia tiha. Apa ho ama la fo ha’u ba eskola hein uma deit, entaun ha’u sai hosi uma subar hodi mai tama asrama Aileu, iha asrama ha’u aprende suku sapatu no las bisikleta, remata asrama iha Aileu ha’u mai fali asrama Aimutin, ne’e padre ida mak tau matan, entaun oinsá mak hanorin ami kona ba toka, depois ha’u muda ba Centro Nasionál reabilitasaun (CNR) Becora, iha ne’ebá sira hanorin kona ba lem sapatu hafoin sira fo material sira ba suku sapatu, lem, hamoos sapatu,” Jose haktui iha Largo Lecidere, 09/09

Jose dehan bainhira hahú halo negósiu suku sapatu la iha osan,  modal ne’e hosi nia kolega ema ho difisensia hodi fo empresta osan $1.00, maski nia kolega hanoin katak atu sosa hahán hodi han, maibé saida mak Jose hanoin iha katak osan $1.00 bele sai barak liu tan.

“Modal ne’e mai hosi ha’u nia kolega defisiénsia Frederico nia baibain fa’an sigarru ho pulsa iha Pateo oin, ha’u debe ninia $1.00, hau sosa kabas $1.00 hodi ba suku sapatu, no to’o ohin loron ha’u hetan osan $1.00 to’o $2.00,” dehan nia

Nia konfesa katak iha nia esperiensia bainhira suku sapatu iha warung iha Largo, nia sempre hateten, “hau suku imi nia sapatu lalika selu, maibe tau deit hahán bikan ida, hodi hau han deit”.

Jose hateten maski moris hanesan ema ho defisiénsia, maibe nia deside lakohi tane liman ba ema seluk, nia hatene oinsá uza abilidade ne’ebe iha, hodi hikis kosar ba nia moris. Nia dehan hahú husi buat kiik mak sai boot, dalabarak deputadu sira mos lori sapatu ba nia hodi suku

“Suku sapatu ne’e foin fulan rua, loron ida bele kaer $106, maibe sorte la iha kada loron bele hetan deit $15.00”, tenik Jose

Osan ne’ebé Jose hetan hodi selu mos nia kost ho presu $30.00, husi rendimentu balun, tulun nia maun sira nia oan nian eskola. Maibe pandemia COVID-19 ne’e hamosu difikuldade oituan ba nia, nune’e Jose husu tulun governu karik bele prepara fatin ne’ebe asesivel ba sira, nune nia bele fila liman hodi rai sasán hodi suku sapatu.