Reportajen Umbelina & Juvinal
Vendedores fa’an ikan iha merkadu Taibesi hato’o sira nia preokupasaun relasiona ho autoridade munísipiu Dili la kria kondisaun dignu ba vendedores fa’an ikan, nune’e vendedór sira hetan rendimentu ne’ebé diferente tebes iha fatin anterior Bidau Santa Ana.
Porta-voz, Cesario Martins liu hosi Konferénsia Imprensa hateten, sira hosi grupu ai-leba ikan sente la satisfas ba aktus ne’ebé IX governu konstitusional liu hosi Sekretáriu Estadu ba Asuntus da Toponimia e da Organizasaun Urbana hamutuk ho Autoridade Munisipiu Dili, halo eviksaun forsadamente ba vendedór ikan iha Bidau Santa Ana, hodi muda vendedores ba merkadu Taibesi iha loron 8 de Janeiru de 2024, maibé autoridade munísipiu Dili la kria kondisaun dignu ba vendedores sira ne’ebé fa’an ikan iha merkadu Taibesi.
“Objetivu atu halibur vendedores abulante ikan sira hodi organiza di’ak ba konservasaun no prevene, okupa espasu públiku ba asegura ijiene ikan iha aredores fa’an ikan nian, nune’e durante tinan barak ona ami utiliza fatin refere ho responsabilidade no apropriadu duni ba fa’an ikan tanba bele uza tasi-been ba rega ikan no fatin apropriadu ba komparador sira atu asesu.” Dehan porta voz Cesario Martins ba Jornalista sira liu hosi Konferensia Imprensa, iha Bidau Santa Ana, sexta-feira, 19/01.
Nia dehan, fatin Bidau Santa Ana mós labesik ba komunidade barak hodi simu bee fo’er hosi fase ikan nian, nune’e mós mantein hamoos no asegura ijiene ba ikan no areador tomak. Fatin Bidau Santa Ana konsege ajuda sira vendedores nia ekonomia uma laran no hasa’e sira nia rendimentu.
“Hosi difikuldade ne’ebé ami efrenta iha fatin foun merkadu Taibesi mak ami hato’o ami nia preokupasaun katak karik ami mantein fa’an ikan iha merkadu Taibesi mak sei prejudika ami vendedór sira nia rendimentu no afeta ba ami nia ekonomia, tanba fatin la asesível ba ema atu mai sosa ikan no ikan dodok sai aat hotu.” Nia informa.
Nia hatutan tan, ida sei aumenta problema ijiene ladi’ak iha merkadu Taibesi tanba laiha sistema lixu di’ak hodi mantei ijiene no saúde, nune’e vendedores ikan husu ba ministériu relevante hanesan, Ministériu Agrikultura Pekuária, Peskas no Florestas, Ministériu Komérsiu no Indústria no Autoridade Munisípiu Dili hodi halo rekonstrusaun ba merkadu ikan nian iha área tasi-ibun Bidau Santa Ana.
Nia hakotu, vendedores fa’an ikan ho inisiativa kria servisu rasik ba sira nia aan no sira nia maluk sira seluk hodi sustenta sira nia aan no família liu husi fa’an ikan maibe govermu taka dalan ka la konsidera sira nu’udar Timor-oan, nune’e husu ba deputadu sira iha Parlamentu Nasional atu halo levantamentu dadus nune’e governu bele rona sira nia lian nune’e bele foti lalais solusaun ba preokupasaun refere.
