Reportajen Juvinal Cabral dos Santos
“Loloos ne’e atu muda vendedór tenke iha karta notifikasaun, signifika fo xamada atensaun para ami prepara atu sai. maibe ami nia ne’e to’o agora la hetan karta notifikasaun”. Vendedor Agapito da Silva
Vendedor sira ne’ebe durante ne’e faan ikan iha tasi ibun, maibe Autoridade Munisipiu, hasae avizu hodi fo loron 3 hodi hamamuk fatin besik tasi ibun, maibe laiha karta notifikasaun ruma ne’ebe entrega ba nogisiante hirak nee.
Liuhusi konferénsia imprensa portavoz negosiante, Agapito da Silva hateten iha loron Kinta ne’e autoridade munisipiu sira mai avizu, fo tempu loron tolu atu hamamuk fatin, maibe seidauk iha karta notifikasaun nune’e Segunda sira mai ho seguransa mak Sekretáriu Estadu Asuntu Toponímia no Organizasaun Urbana hateten katak karta ne’e mai antes ona.
“Ami rona Sekretáriu Estadu ko’alia dehan karta notifikasaun ami nia iha, maibe lahatene Xefe Suku ida uluk mak simu ga ida agora mak simu karta ne’e to’o agora ami seidauk hetan”, dehan Agapito ba jornalista sira, 19/01.
Vendedor ne’e kestiona bainhira la iha karta notifikasaun mak muda vendedór, signifika tratamentu povu la dignu, nune’e iha Segunda ne’e sira atu ko’alia no konfirma fali ho Sekretáriu Estadu asuntu toponímia, maibe nia dehan agora laos tempu atu koalia, maibe tula sasan sira ba hotu merkadu Taibessi
Nia dehan governu muda tiha sira ba iha Taibessi, maibe la iha autoridade munisípiu ida ne’ebé ba tuir hodi observa kondisaun fa’an ikan ne’e dignu ba vendedores.
“Fatin ne’ebé la dignu tanba bee la iha, hariis fatin la iha inklui bee dalan atu sai mos la iha agora ikan seidauk barak bainhira ikan barak rega bee tenke sai ba estrada no dois komunidade sira hela iha kraik bele kestiona”, dehan Agapito
Iha sorin seluk Xefe Suku Alexandrino Mesquita da Costa Braz, esplika bainhira Sekretáriu Estadu Asuntu Toponímia no Organizasaun Urbana atu hasai vendedór fa’an ikan iha tasi ibun, iha loron tolu antes ne’e sira avizu ona, atu hamamuk fatin ne’e tanba estadu prepara ona kondisaun fa’an ikan fatin iha merkadu Taibessi.
Xefe suku Alexandrinho Mesquita da Costa Braz. [Foto: Umbelina | 19.01.2024]
“Tuir ha’u hatene karta notifikasaun ba komunidade fa’an ikan ne’e mai antes ona hanesan ita nia Sekretáriu Estadu Asuntu Toponímia no Organizasaun Urbana iha entrevista hateten, karta ne’e nia haruka mai iha tinan kotuk se la sala fulan Setembru, maibe kona ba mai para atu hasai sira ne’e ha’u la iha karta“, dehan Xefe Suku Bidau Santa Ana, iha nia servisu fatin, Sesta 19/01/2024.
Alexandrino dehan nia la hetan karta notifikasaun ne’ebé mak mai husi autoridade lokál, konaba vendedor sira fa’an ikan iha tasi ibun, karik bele eis Xefe Suku mak simu, Xefe Suku atuál simu kargu ne’e la iha informasaun.
“Ita nia komunidade sira kestiona ne’e los, tanba antes ne’e estadu haruka sira fa’an ona iha merkadu Taibessi maibe iha momentu ne’eba sira hetan problema balun ema ida hetan sona sira rasik deklara los duni balun sai vitima” dehan Xefe Suku Bidau Santa ana
Nia haktuir vendedór sira ne’ebé fa’an ikan iha tasi ibun muda hotu ba ona merkadu Taibessi, maibe komunidade balun kestiona governu prepara kondisaun fatin la dignu bee la iha, hariis fatin la iha rendimentu la di’ak
