Home Feature Vendedor Kiik Iha Camea Terminal, Uluk Hetan $10.00 Agora $2.00 Deit

Vendedor Kiik Iha Camea Terminal, Uluk Hetan $10.00 Agora $2.00 Deit

315
0
Vendedor kiik, Gulhermino Barros. [Foto: Umbelina | 14.10.2021]

Reportajen Umbelina dos Reis 

“Ami nia rendimentu kada loron heto’ok ki’ik liu tan, uluk hetan $10.00 agora hetan deit $2.00  kada loron, maibé ami iha uma laran na’in tolu, susar loron atu hadi’ak moris ne’e” tenik vendedor, Gulhermino Barros ba Neon Metin iha Ponte Ninin Mota Camea, àrea Posto Administrativu Kristu Rei, Munisípiu Díli.

Iha ponte Camea ninin, Gulhermino Barros ho nia maluk ne’ebé moris husi fila liman, hari’I barraka, hodi fa’an modo ne’ebé sira hola husi Hera ka balun ne’ebé sira sosa husi ai-leba husi Remexiu, Munisípiu Aileu no fatin seluk iha Díli laran.

Fa’an modo iha loron ninin, rendimentu la bo’ot hanesan ema seluk ne’ebé fa’an sasan iha kios ka loja sira ne’ebé iha Díli laran, sira la lakon korajen no iha nafatin beran, atu luta nafatin ba ohin, hodi hetan moris ida ne’ebé mak di’ak liu iha loron aban.

“Ami iha uma laran na’in tolu, maibe loron ida, hetan dolar rua, susar teb-tebes ba ami, atu hetan osan hodi hakbi’it ami nia moris” haktuir Guilhermino Barros ne’ebé nia belun sira bai-bain bolu nia Boba Gele.

Nia moris husi fila liman, liu ona 50 husi nia oin nota katak, rento’os iha riska no lulun barak, maibé korrajem nunka mate, atu manteín kna’ar ne’ebé nia halo tinan barak nia laran.

Dader san de’it Guilhermino Barros- Boba Gele, doku nia xapeu hodi ba hamos fatin ne’ebé atu fa’an modo no hola mós husi fatin seluk, atu bele fa’an tutan ba ema seluk, ne’ebé hela iha Aldeia hanesan Fatuk Francisco, Terminal no komunidade seluk husi Suku Kamea no Bekora.

“ami moris depende de’it ba ida ne’e, dala ruma modo balun dodok, tamba ema la hola, maibé ami tenke halo nafatin hodi aguenta moris” hateten Boba Gele, ho neon kraik, waihira refleta situasaun moris no rendimentu lor-loron.

Husi dader tuku neen dadeer, antes funsionáriu husi estadu ka privadu sai ba servisu Boba Gele hahu ona arranja modo ne’ebé mak atu fa’an to’o tuku sia no tuku sanulu kalan, depende ba komprador sira.

Iha loro-kraik, tanba vendor ambulant no ai leba barak, sira obrigadu muda husi barraka ne’ebé mak nia fa’an no muda fa’an iha ponte Camea leten. Situasaun ida ne’ebé ih risku ba asidente viasaun, tamba hamosu engarrafamentu no movimentu ema no transporte maka’as iha ponte leten no dala ruma sai hanesan preokupasaun ba hotu.

“dader to’o meiu dia ami iha barraka, pois ba tuku tolu ka hat nune’e ami tenke muda ba ponte leten, tamba ema barak mak fa’an no dala ruma, wali kota (saneamentu munisípiu Díli), mai lalin hotu modo ne’ebé mak ami fa’an, susar los ba ami” hateten Guilhermino Barros.

Vendedor Izolina Maria Fernandes. [Foto: Umbelina | 14.10.2021]

Izolina Maria Fernandes, viziña ho Guilhermino Barros mos hakna’ar an hanesan fila liman no kada loron tenke hola modo husi Merkadu Taibessi no Hera, hodi fa’an tutan ba komunidade iha Suku Kamea.

“ami fa’an modo hanesan, lis tomate, modo tahan no seluk tan, lor-loron ami hola modo husi Taibessi no Hera no fa’an tutan, ami tenke halo ida ne’e no ami nia moris mak nune’e ona” tenik Izolina Maria Fernandes iha Barraka iha Ponte Camea ninin. 

Hanesan mos Gulhermino Barros ne’ebé muda fatin iha loro-kraik tamba ema barak mak fa’an modo, Izolina Fernandes mos muda sai husi Baraka ba Ponte leten, hodi ema seluk bele hola sasan ne’ebé mak nia fa’an.

“loro-kraik ami tenke fa’an sai husi Baraka ba ponte leten, atu ema bele hola modo ne’ebé ami halo esforsu oi-oin hodi hola husi fatin seluk, hodi ami bele hetan osan hodi ajuda ami nia oan no família” Haktuir Izolina.

Iha situasaun pandémika ne’e, sai hanesan problema bo’ot ba sira, tamba númeru komprador sira, la hanesan tempu normal no situasaun ne’e halo vendedor sira nia rendimentu tuun maka’as.

“uluk antes estadu emerjénsia ami hetan to’o dolar sanulu kada loron, agora tun ba dolar rua ka tolu, susar teb-tebes” haktuir Izolina ho Laran triste, ba realidade ne’ebe sira hasoru.

Biar iha rendimentu ki’ik, sira konsiente tebes ho riksu hada’et husi COVID-19 no kumpre regra sanitaria, inkliu halo distansiamentu sosiál, atu bele protégé an husi risku hadaet virus ne’e.

“virus ne’e perigu duni, tamba ema barak mak mate ona no ita hotu tenke kumpre regra prevensaun” hakotu Izolina Fernandes, hodi dezafia mos ema seluk atu kumpre regra sanitária.

Print Friendly, PDF & Email

LEAVE A REPLY

Please enter your comment!
Please enter your name here