Reportajen Santina Lucia da Costa
Prezidente Republika Dr. Francisco Guterres Lu-Olo halo enkontru ho membru Konsellu Superior Defeza Seguransa (KSDS) ho Konsellu Estadu (KE), hodi extende Estadu Emerjénsia ba dala-19, hodi oinsa fó protesaun evita virus ne’ebé atu tama.
Hafoin enkontru ba jornalista sira, Xefe Casa Sivíl, Francisco Maria de Vasconselhos informa, Konsellu Superior Defeza Seguransa ho Konsellu Estadu depois diskute, sira rekomenda ba Prezidente Repúblika atu hato’o pedidu Estensaun Estadu Emerjénsia ba Parlamentu Nasionál hodi hetan autorizasaun.
“KSDS ho KE rekomenda Prezidente Repúblika atu husu ba Parlamentu Nasionál atu autoriza ka la autoriza ne’e iha Prezidente Parlamentu Nasional. Pedidu ne’e lalais liu bele ohin tarde liu aban, mais tenta ohin loron ne’e bele haruka ba. ” hateten Xefe Casa Sivíl, Francisco Maria Vasconselhos, iha Palásiu Prezidensiál, Nicolau-Lobato, Bairo Pité, 25/10.
Xefe Casa Sivil dehan Extensaun EE nafatin, no medida ne’e depende ba dezenvolvimentu ne’ebe mak iha, agora daudaun virus foun ne’ebé mak iha parte balun iha mundu iha, maibé konfinamentu obrigatóriu agora laiha, EE ne’e ba liu oinsá protesaun evita virus ne’ebé atu tama ne’e bele evita ida ne’e.
Iha Fatin hanesan, Diretór Ezekutivu FONGTIL, Daniel dos Santos, hateten, Sosiedade Sivíl hato’o kona-ba oinsá atu reforsa medida preventiva, tanba ita seidauk tama ba nova normalidade.
“Entaun ita hanoin maka oinsá medida EE ba dala-19, bele hanesan impoin regra ruma ba oinsá medida preventiva hanesan, uza máskara, fase liman ho sabaun, agora númeru ema infetadu ne’e tun, signifika iha poténsia boot posibilidade ita tama ba nova normalidade, maibé medida preventiva ne’e tenke hasa’e.” realsa Diretór Ezekutivu FONGTIL.
Daniel dos Santos dehan FONGTIL nia observasaun númeru vasina mós aumenta númeru kazu mos tun, oinsá mak ita nia kontribuisaun ba nova normalidade.
Nia akresenta iha nesesidade ba EE dala-19 tanba ita seidauk tama iha nova normalidade signifika ema internasional sira ita atu kontrola terrestres, transporte aero, no marítim, oinsa ita atu limita, ema tama mai karik kuarentena.
Nia hatutan atu atividade ekonomia lao no movimentu sira lao, ezije simples ida mak medida preventiva ne’e.
