Reportajen Santina Lucia da Costa
Institutu Kdadalak KDA’I realiza semináriu kona-ba Prosesu Formulasaun Polítika Públika bazeia ba evidénsia: Esperiénsia Timor-Letse nian, ne’ebé involve autór ho esperiénsia riku no interese oioin iha area ne’e, semináriu ne’e realiza iha Timor Plaza, Suai Room.
Ba jornalista sira Prezidente Konsellu Administrasaun KDA’I, Virgílio da Silva Guterres hateten KDA’I organiza seminariu ida ho tópiku, Polítika Publika bazeia ba evidénsia, atividade ne’ebé sai foku ba klibur KDAI, objetivu atu fahe hanoin públiku, liuliu partidu polítiku sira, akadémiku, estudante, saida mak ita entende kona-ba polítika publika ka public policy, no saida mak ita entende kona-ba polítika publika bazeia ba evidénsia.
“Ita hotu hatene katak, ita nia dezenvolvimentu ne’e mak atu satisfás ema maioria, entaun oinsa mak atu hatene ema maioria nia hakarak, ninia interese, entaun ita tenke halo estudu, peskiza, buka hatene populasaun Dili no Munisípiu sira ne’e nia hakarak saida, atu hatene nia hakarak ne’e tenki tun ba kraik, halo peskiza, depois formula, ikus mai elabora konseitu polítika publikas.” hateten, Prezidente Konsellu Administrasaun KDA’I, Virgílio iha Timor Plaza, Suai Room, 26/10.
Iha fatin hanesan Ministru Prezidénsia Konsellu Ministru, Fidelis Leite Magalhães afirma, Policy Peace ne’e iha prinsípiu balun hanesan pratika ekonomia sira ne’ebé mak demokratiku iha mundu ho ninia peritus ninia definisaun rasik maibé prinsipiu balun ita aproveita iha Timor jeral, maka klasifikasaun husi prioridade sira ita tenki ho forma rasional klasifiku ne’ebé maka importante liu para ita tenki halo.
Nune’e Partisipante Estudante UNTL, Lucitania Cris hateten seminariu kona-ba politika publika ne’e di’ak teb-tebes, oradór na’in rua husi KDA’I ne’e esplika detalhus los bazei ba sira nia esperiensia rasik.
“Hau nu’udar estudante senti orgullu tebes no apresia, tanba atu hetan oportunidade, bele rona konteudu ne’ebé importante ne’e susar tebes la fasil, entaun ho seminariu ne’e konsege aprende buat barak, kona-ba saida mak politika publika, saida mak akontese iha Timor ne’e rasik, liuliu partisipasaun vida politika no mós ita nia komunidade sira.” Dehan, Estudante UNTL, Lucitania Cris.
Nia hatutan, importante ba ita nu’udar joven atu hatene situasaun aktual no bele mós sai útil ba iha futuru, kona-ba politika publika baibain ita nia komunidade sira dehan, politika ne’e ladi’ak ka buat ne’ebé mak bosok, maibé liuhusi seminariu ida ne’e bele klarifika, bele fó naroman ida, maneira ida ideias atu atinji bem estar sosiedade nian.
Lucitania husu ba KDA’I kontinua halo semináriu sira hanesan liuliu ba joven sira no komunidade, tanba dalabarak ita la komprende kona-ba polítika publika ne’e rasik, semináriu hanesan ne’e importante hodi fanu ema fó koñesimentu ba sosiedade sira.
Institutu Kadalak, KDA’I mak nu’udar klibur intelektual ne’ebé konsentra iha diskusaun no peskiza sientifika hodi apoiu ba formulasaun politika informadu no diseminasaun politika governu ba Timoroan sira hotu.
Grupu ne’e harii iha tinan 2014 ho membru Timoroan besik na’in 50 ho kompetensia intelektual no matenek iha area oioin.
