Reportajen Silvino Freitas
Diresaun Tranzitu no Seguransa Rodaviariu Nasional hamutuk ho Diresaun Nasional Transporte Terestre (DNTT) halo ona avizu konjunta nunee transporte sira tenke kumpri lei kodigu estrada iha ambitu selebrasaun loron finadu, nunee parte Diresaun Tranzitu no Seguransa Rodaviariu fo ona orientasaun ba seksaun tranzitu munisipiu hotu atu halo Check Point hodi kontrola viajen sidadaun sira nian husi capital ba minisipiu liuliu iha Baucau no Manatuto atu kontrola viajen transporte neebe tula pasajeiru liu kapasidade transporte nian neebe halo viajen husi Dili ba Baucau, Vikeke no Lautem.
Diretora DNTT Maria Antonia Vitor da Costa dehan, iha selebrasaun loron boot finadu 2 novembro transporte sira hanesan bus, mikrolete no anguna labele tula pasajeiru liu kapasidade karreta nian no labele tula pasajeiru tuur iha leten no tabele inklui tabele iha kotuk tanba nee perigu ba ema nia vida no la seguru iha viajen pasajeiru sira nian.
“apela ba motorista transporte publiku sira katak tuir artigu 54 alina 4 kodigu estrada bandu tula pasajeiru liu kapasidade karreta nian labele tula pasajeiru kuandu laiha ona tuur fatin, tanba tula pasajeiru tuur iha kapon leten nee la sente seguru atu halo viajen too ita nia destinu” dehan Diretora DNTT Maria Antonia Vitor da Costa ba jornalista sira liuhusi konferensia imprensa neebe halo iha DNTT Balide, (29/10).
Suprentidenti Asistente Polisia Domingos Gama dehan, kada tinan iha selebrasaun loron boot sempre akontese asiente fatal neebe boot liu tanba loron boot viajen ema nian husi capital ba munisipiu barak liu hodi hadau malu transporte, nunee mos iha lei kodigu Estrada numeiru 6/2003 artigu 54 ba motorist sira atu tula pasajeiru iha nia limita tanba lei refere bandu atu tula ema liu kapasidade karreta nian.
“mais kada tinan tama loron boot hanesan nee parte diresaun transporte tereste polisia tranzitu sempre avizu hela deit, mais falta konsensia husi ita nia kondutor sira” dehan Suprentidenti Asistente Polisia Domingos Gama iha DNTT Balide.
Nia mos apela ba komandu munisipiu 12 inklui RAEOA atu apoia seguransa passa revista ba viatura sira neebe tula pasajeiru liu nia kapasidade husi Dili ba Vikeke no Lospalos liu Manatuto no Baucau seksaun seguransa iha manatuto no baucau tenke prende no kaptura, husi atuasaun sira hanesan maka bele prevene situasaun sira neebe ita la espera, maibe laiha intensaun atu hatama reseita ba kofre estadu tanba vida povu nee prinsipal.
“tuir loloos ita nia sidadaun sira maka preokupa sira nia vida tanba ita nia sidadaun la konsensia atu asegura vida pesoal ida idak entaun presiza prezensa estadu nian maka liu husi atividade polisia tranzitu rodaviariu nian” dehan Suprentidenti Asistente Polisia Domingos Gama.
Nia dehan tan, husi atuasaun polisia nian nee atu fo hanoin katak lei kodigu Estrada neebe regula tula pasajeiru nian, nunee tenke rona hodi kumpri ka halo tuir regra neebe tranzitu fo sai tanba ita nia vida nee iha ita nia liman rasik, nunee mos husi pasa revista nee mos ba motorizada sira tenke uza kapaseti tuir lei artigu 76 nian uza kanu resin nomos dokumentus ba transporte sira nunee transporte publiku no privada nee sei halo hotu pasa revista.
“nee ita orienta ona ba komandu municipal sira liuliu ba seksaun tranzitu neebe destaka iha kada munisipiu loron boot hanesan nee hotu hotu tenke iha atividade oinsa atu asegura ba loron boot matebian nian, realidade ita nia motorista sira nee laiha konsensia atu kumpri lei kodigu Estrada nee rasik ho ida nee maka prezensa polisia tranzitu nian nee la signifika atu impede sira nia movimentu asegura sira nia vida viajen nee maka liu husi passa revista maka bele prevene ema neebe lakohi kumri lei” konklui Suprentidenti Asistente Polisia Domingos Gama.
