Reportajen David da Costa Gusmao
Porta voz ba KomisaunInterministeriál ba Implementasaun vasina Covid-19 iha Timor-Leste, Doutora Danina Coelho informa iha fulan Outubru iha vasina AstraZeneca hamutuk 14,180 mill mak expire, nune’e vasina AstraZeneca ne’ebé mak atu besik expire hamutuk 140,090 doses.
“Vasina AstraZeneca ne’ebe ita simu husi covax facility hamutuk 100.800 doses, Nova Zelandia 24.000 doses, Australia 577.850 doses, Portugal 142.000 doses no Japaun 168.000 doses. Husi totál vasina AstraZeneca hamutuk 1.012.650, doses mak ita hetan husi parseiru sira,”dehan Dra. Danina Coelho liu husi konferénsia imprensa iha MSSI Kaikoli, Kinta 11/11.
Nia esplika husi total vasina ne’e iha Outubru, vasina AstraZeneca hamutuk 14,180 mill mak expire. maibe iha loron 9 Novembru mos expire iha, “hau seidauk iha númeru ezatu, mas espera katak iha semana oin mai, hau bele hetan hodi informa fali ba ita boot sira”.
Nai dehan vasina sira ne’eba mak expire ne’e mai husi munsipiu sira hotu deit, laiha dadus konkreta maibe bele dehan husi munisipiu sira ne’e iha uitoan hotu, so exeptu Dili mak laiha vasina ida expire. vasina sira ne’ebé expire ne’e SAMES mak sei rekolla sira ne’e hotu, hodi halo destruisaun.
Nune’e mos AstraZeneca ida besik atu expire iha 23 Novembru hamutuk 10,090 doses, no atu expire iha 30 Novembru hamutuk 130,000 doses, no total atu expire iha fulan Novembru hamutuk 140,090 doses, “maibe ita nia kampaña vasinasaun ne’e kontinua lao, espera katak ita labele estraga vasina sira ne’e”.
“Ita mos simu vasina Sinovac husi nasaun china hamutuk 100.000 doses no Pfizer ita simu husi covax facelity hamutuk 100.620 doses,” nia dehan
Entertantu dadus husi Komisaun interministeriál ba implementasaun vasina Covid-19 iha Timor-Leste katak iha Timor- Leste simu ona dose primeiru iha 76’4% no dose segundu 51.0 %. Iha munisipiu Covalima dose primeiru iha 93,0% no segundu 62.8 %. Iha Viqueque Dose primeiru 90,7% no segundu 60.0 %.
Iha Dili dose primeiru 83,4% no segundu 74.2 %. Iha primeiru dozes 82, 3% no segundu 60.6 % ZEEMS ( Oecusse ). Baucau primeiru dose 80,0% no segundu 48.8 %. Iha Manatuto dose primeiru 76,5% no segundu 42.9 %. Iha Manufahi primeiru dose 75,3% no segundu 34.4 %.
Iha Lautem primeiru dose 70.7% no segundu 38.3 %. Iha Aileu dose primeiru 70,0% no segundu 31.8 %. Iha Ainaro dose primeru 68,3% no segundu 28.9 %. Iha Bobonaro dose primeiru 63,6% no segundu 34.5 %. Iha Liquica dose primeiru 63,1% no segundu 35.0% no Ermera iha dose primeiru 59,8% no segundu 26.9%.
To’o data ohin nian, Timor – Leste rejista ona kazu COVID – 19 hamutuk na’in 19,804 , no rezulta ona iha mate hamutuk na’in 122.
