Home Uncategorized Enkaregadu Negósiu EUA ho Jornalista Halo Diskusaun Meza Redonda Konabá Mudansa Klimátika

Enkaregadu Negósiu EUA ho Jornalista Halo Diskusaun Meza Redonda Konabá Mudansa Klimátika

153
0

Reportajen Adroaldo ‘Saretukau’

Enkaregadu Negósiu Embaixada Estadus Unidus Amérika (EUA) iha Timor-Leste halo diskusaun meza redonda ho jornalista sira hosi media online, jornál no televizaun konabá mudansa klimátika, iha Emabaixada Amérika, Praia dos Coqueiros, Díli, Kuarta, 17 Novembru, liu hosi Embaixada nia programa trismetral Forum KLABIS.

Iha diskusaun meza redonda ne’e Enkaregadu Negósiu EUA iha Timor-Leste, Tom Daley, kontete bele ko’alia ho jornalista sira konabá área mudansa klimátika.

“Bemvindu ba ita boot sira hotu, ha’u hakarak duni hasoru malu ho média, jornalista sira atu ko’alia konabá tema Mudansa Klimátika nomos rejultadu hosi konferénsia konabá Mudansa Klimátika foin da-dauk” hateten Enkaregadu Negósiu Tom, durante diskusaun iha Embaixada Amérika, kuarta, 17/11.

Nia subliña katak, krize klimátika ne’e iha tiha ona, ida ne’e la’os dezafiu ba future jerasaun, maibé ne’e fenómena ida ne’ebé ita tenki hasoru ohin loron, konfronta iha tempu prezente. Nia hatete la iha dezafiu ida boot liu tantu ba Estadus Unidus nomos Timor-Leste, se la’os agora nomos mundu tomak hasoru mudansa klimátika, ita hotu-hotu hamutuk agora da-dauk ne’e, konfronta mudansa klimátika.

“Ita haree ona impaktu aat liu hosi mudansa klimátika ne’ebé sai tiha ona realidade ida hanesan inundasaun ne’ebé estraga buat barak, tempu bai-loro ne’ebé naruk ba be-beik, asidifikasaun tasi, sai mer liu tan nomos inséndiu florestal, ahi han ai-laran. Impaktu hirak ne’e impaktu ema barak nia moris, iha ne’e nomos iha mundu tomak nomos ema nia fonte rendimentu ba moris nian” hateten Enkaregadu Negósiu Tom.

Nia hateten responde ba krize klimátika ne’e importante nomos oportunidade ida atu rekopera ekonomia, harii future ida sistentavel liu tan, kria empregu ne’ebé selu saláriu di’ak, no promove ita nia reziliénsia ba mudansa klimátika.

Nia esklarese katak iha rejiaun Indo-Pasífiku ne’e, sai hanesan foku importante ida ba polítika no estrategia iha EUA nian. Iha rejiaun ne’e ita haree país sira ne’ebé emisor gás estufa boot liu iha mundu hanesan Repúblika Popular Xina, Índia no Japaun. Nia hatutan iha rejiaun ne’e ensere mos nasaun sira ne’ebé ke sai vulneravel ba mudansa klimátika hanesan Timor-Leste.

Nia hateten katak buat ida ne’ebé sai hanesan tema importante liu hosi konferénsia klimátika COP26, iha Glasgow, Scotland mak anúnsiu hosi Prezidente Biden, konabá planu emerjénsia ba adaptasaun no rejiliénsia ne’ebé koñesidu ho naran prepare. Servisu prepare ne’e sei ajuda ema to’o metade de biliaun hosi adapta ba efeitu sira hosi mudansa klimátika liu hosi prepara ne’e.

“Prepare ho objetivu atu halo buat tolu simples, ida, fo informasaun ba ema hotu-hotu, atu nune’e sira bele salva sira nia moris no sira nia fonte rendimentu hodi hatutan sira nia moris, ba daruak mak halo planu no atu mitiga efeitu sira hosi mudansa klimátika ne’ebé karik sei mai, datoluk nian mak atrai fundu hosi setor públiku no privadu atu nune’e bele konkretiza planu hirak ne’e no ezekuta planu hirak ne’e atu nune’e planu sai sustentavel no sai realidade”, tenik Enkaregadu Negósiu Tom

Iha parte sorin Xefe Asuntu Públiku Embaixada EUA iha Timor-Leste, Tim Johnson ba jornalista sira katak diskusaun ne’e hanesan oportunidade ida ba jornalisa sira hodi fornese informasaun importante sira ba iha sosiedade.

“Iha ne’e hanesan oportunidade ida ne’ebé ami iha liu hosi programa ida ne’e hodi envolve jornalista Timor oan, esensial liu ba demokrasia Timor-Leste nian hodi fornese ba sira informasaun ne’ebé sira presiza ba sosiedade no diáloho ida ne’ebé nakloke, tanba ne’e ida ne’e, importante tebes atu envolve jornalista sira liu hosi forma ida ne’e hodi fo oportunidade ba sira hodi husu pergunta konabá isu ne’e sira ne’e importante ohin loron” hateten Xefe Asuntu Públiku Tim iha Emabixada Amérika.

Partisipa iha diskusaun ne’e mak Enkaregadu Negósiu Emaixada EUA, Xefe Asuntu Públiku Embaixada EUA no Diretora USAID hamutuk ho jornalista hosi Media Online Neon Metin, Tatoli.IP, The Oekuse Post, STL, GMN TV, RTTL.EP no VIP TV.

Print Friendly, PDF & Email

LEAVE A REPLY

Please enter your comment!
Please enter your name here