Reportajen David da Costa Gusmao
Prezidente Repúblika (PR), Dr.Francisco Guterres Lú Olo ho nia espoza Cidália Nobre Guterres hamutuk komitiva vizita jardín eroi Ossuáriu martires iha suku Kasa postu administrativu Ainaru Vila munisípiu Ainaru atu memoriza nafatin eroi martire sira nia sakrifísiu ba iha rai ida ne’e.
Prezidente Repúblik, Dr.Francisco Guterres Lú Olo, informa eroi martire sempre hola parte iha istória Timor-Leste nian luta ba libertasaun nasionál nian.
“Ami tama mai iha rai klaran iha ramelau hun ami mai vizita ita nia maun alin sira hotu ne’ebé maka iha tempu ida difisil luta ba ita nia libertasaun tebtebes e tempu ida uniku,” dehan Prezidente da Republika Lú Olo, iha jardin eroi martires Ossuáriu, Ainaru kinta 18/11.
Xefe estadu dehan eroi sira ne’ebé 3000 nia restu mortais tau iha fatin ida ne’e, fó sira nia sasin hodi fó sira-nia sakrifísiu boot ida sira nia vida tomak hamutuk ho maluk Timor-Leste tomak nia laran hodi liberta Timor no fó liberdade independénsia ne’e mai Timor-Leste
Portantu Prezidente Repúblika ho ninia komitiva tomak mai iha ne’e para hodi memoriza nafatin sira iha sakrifísiu boot ida ba iha rai ida ne’e.
“Mate restu nafatin rai iha ne’e, ida ne’e governu ninia kompetensia klaru ke to’o iha nia tempu ha’u fiar katak fatin ne’ebé prepara ona ba sira sei haloot sira iha sira-nia fatin,” nia hakotu.
Iha fatin hanesan Administradór postu administrativu Ainaru Vila, Nazário de Araújo sente kontente tebes ho prezensa Prezidente Repúblika ho espoza no kometiva tomak iha Ainaru.
