Reportajen Santina Lucia da Costa
NGO Belun disemina informasaun konaba prevensaun no responde ba violénsia bazeia ba jeneru, ba Xefe Suku, komunidade no Juventude sira, oinsá hapara violénsia hasoru feto no labarik feto.
Koordenadór ba Programa NGO Belun, Miguel Maia Soares hateten fahe informasaun ba komunidade sira, atu bele hetan kle’an di’ak liu, hodi bele prevene violénsia hasoru feto no labarik, tanba motto iha Spotlight Initiative dehan hapara violénsia hasoru feto no labarik.
Nia dehan objetivu husi sosializasaun ne’e atu disemina informasaun kona-ba prevensaun no responde ba violénsia bazeia ba jéneru.
Miguel informa katak iha fulan tolu liu ba hetan fiar husi UNFPA, hodi halo peskiza ida kona-ba norma sosiál, ne’ebe foku ba iha impaktu pornografia ba juventude sira, husi rezultadu hirak ne’e hetan rekomendasaun hodi kontinua fahe informasaun oinsa preven no hapara violensia hasoru feto no labarik feto.
Miguel hatutan husi diskusaun ho suku no joven sira husi suku, grupu LGBTI, Joven defisiénsia sira, entaun sira hetan rekomendasaun katak, durante ne’e informasaun ko’alia kona-ba prevensaun no responde ba violénsia doméstika la dun to’o iha komunidade sira.
“Husi Disemina informasaun ne’e hodi fahe material kampaña hanesan sticker no kamizola ne’ebé ami hakerek liafuan hamutuk Prevene Violénsia, labele halo Violénsia hasoru feto no Labarik.” tenik, Koordenadór ba Programa NGO Belun, Miguel Maia Soares, iha Postu-Administrativu Letefoho, Munisipiu Ermera, 26/11.
Tuir llanu sei disemina iha fatin lima mak hanesan Ermera Villa ho Railako, Munisipiu Bobonaru iha postu Administrativu Balibo no Atabae no Dili
Iha fatin hanesan, Administradór Postu Administrativu Letefoho, Antonio Manuel Soares hateten importante tebes NGO Belun bele fahe informasaun ba malu, oinsá ita hamutuk halo prevensaun kona-ba violensia hasoru feto no labarik feto.
“Hau fiar katak, ho partisipasaun Xefe Suku, no reprezentante suku sira seluk ita hamutuk iha ne’e, hetan informasaun husi oradór sira nia koñesimentu, abilidade, kle’an kona-ba saida mak violénsia ne’e, aimoruk ka reseita karik ita atu prevene oinsa sira mak hatene liu, ita hamutuk prevene violensia ne’e importante los iha ita nia nasaun.” Dehan Administradór Postu Administrativu Letefoho, Antonio Manuel Soares.
Programa ne’e realiza tanba hetan apoiu husi Komisaun Europea, liuhusi UNFAP ho orsamentu $60.00
Oradór ba desimina informasaun kona-ba Prevensaun Responde ba Violénsia Bazeia ba Jéneru, mak hanesan Prezidente Asosiasaun Jornalista Timor-Leste (AJTL), Zevonia Vieira, Koordenadór Sekretáriu Estadu Juventude Desportu (SEJD), Munisípiu Ermera, Marcelino Maia, no Reprezentante PNTL Postu Letefoho, Antonio de Deus.
