Reportajen Silvino Freitas
Governu liuhusi Komisaun Inter-ministeriál adezaun Timor Leste nian ba Organizasaun Mundial Komérsiu (OMK), hala’o reuniaun hodi avalia progresu servisu estadu Timor-Leste nian, atu adere ba OMK no entrega mos relatóriu progresu serbisu tékniku ba Komisaun Inter-ministerial.
Liu husi reuniaun ne’e Ministru Koordenadór Asuntu Ekonomia(MKAE), Joaquim Amaral hateten reuniaun ne’e importante atu avalia pontu situasaun ba servisu ne’ebé halo ona iha 2021 no 2022.
“Reuniaun ne’e atu halo avaliasaun ba pontu situasaun kona ba servisu ne’ebé mak ita halo tiha ona iha 2021 too mai agora, atu nune ita bele hare progresu sira ne’ebé ita atinje ona no estratéjia ne’ebé diak bele halo iha tinan ne’e tuir kalendáriu indikativu” dehan Joaquim Amaral iha Ótel Novo-Turizmu, (08/02).
Tuir nia rezultadu serbisu ne’ebé iha tanba esforsu makaas husi ekipa tékniku sira, hanesan ministériu ne’ebé kompoin iha inter-ministerial, no ajénsia autónomu sira hotu nia konstituisaun, nune susesu la los ministériu ida nian mesak, maibe kontribuisaun husi parte hotu, tanba ne’e susesu ne’e Timor-Leste nian.
“Iha enkontru dala rua alto nivel nian iha fulan Jullu tinan kotuk ita halo ona ezaminisaun ba dokumentu sumariu fatual, iha reuniaun ne’e ita rasik rona husi nasaun membru OMK sira, katak sira apresia tebes kompromisu polítika ne’ebé aas husi governu Timor Leste, ne’ebé hatudu servisu ne’ebé ita halo hatudu katak ita iha preparasaun másimu atu sai membru ba OMK” nia dehan.
Fatin hanesan Embaixadora Timor Leste ba Jenebra, Lurdes Besa hateten Timor-Leste hatudu progresu ne’ebé pozitivu tebes, tanba hakat ona espasu lubuk ida atu sai membru ba OMK, ba dadaun ne’e atu tama tan ba prosesu kritiku balun.
“Enkontru hotu ne’ebé ami komisaun halo iha Jenebra ita nota katak ita iha suporta makaas ba prosesu tomak, nune iha tempu badak ita bele atinji objetivu ne’ebé atu sai membru OMK nian” dehan Embaixadora Lurdes liu husi zoom meeting,(08/02).
Tuir nia atu sai membru OMK sei iha responde ne’ebé krítiku, tanba sei iha ezijénsia ne’ebé makaas liu husi ita nia servisu, tanba ne’e presiza servisu ne’ebé konsisténsia nafatin nia konklui.
