Reportajen Efrem Colo
Konsellu Imprensa (KI) Timor-Leste ofisiálmente lansa livru kona ba planu estratéjiku nu’udar padraun matadalan, hodi orienta serbisu estratéjiku konsellu imprensa nian durante tinan 2022-2026, iha salaun KI, Kintal boot DILI 10/02/2022.
Presidente Interino Konsellu Imprensa (KI), Expedito Dias Ximenes iha nia diskursu hateten lansamentu livru ne’e hanesan padraun ida, atu orienta serbisu instituisaun konsellu imprensa nian durante tinan 2022 ba oin.
“Atu mellora liu tan dezempeñu serbisu konsellu imprensa, plenáriu konsellu imprensa iha 25-10-2021, deside autoriza ezekutivu konsellu imprensa organiza workshop atu elabora planu estratéjiku 2021-2026 nu’udar padraun no matadalan hodi orienta lalaok instituisaun durante tinan ba oin”.
Nia afirma ba prosesu elaborasaun livru planu estratéjiku ne’e, konselu imprensa mós rona ideia hosi parseiru sira hanesan SECOMS, média nain Indenpendente, AJTL No TLPU.
“Prosesu elaborasaun planu estratéjiku ida ne’e involve partisipasaun dirijente ofisial sira konsellu imprensa, hala’o durante loron 5 husi dia 13 to’o 17 de Dezembru iha Maubara Likisa. Iha prosesu elaborasaun rona mós hanoin husi parseiru estratejiku hanesan Secretariu Estado para a Comunicação Social (SECOMS), media nain sira hanesan jornál indenpendente,asosiasaun jornalista timor leste(AJTL), no mós Timor-Leste press Union (TLPU).” tenik Presidente Interinu Expeditu
Expeditu akresenta liu tan Planu Estratéjiku Konsellu Imprensa nian, atu atinje determinadu tempu Konsellu Imprensa iha kapasidade institusionál ne’ebé forte, haree ba kapasidade rekursus umanu ho finanseiru nune’e governu tutela iha área komunikasaun sosiál ho prezensa Sekretariu Estadu Komunikasaun Social presiza apoiu no reforsa Konsellu Imprensa nu’udar orgaun regulador ba setor komunikasaun social.
