Repotajen Umbelina dos Reis
Movimentu Juventude Maubere Nasionalista Demokrátiku (MJMND) hosi Partidu Demokrátiku (PD) hala’o konferénsia imprensa, hodi fo apoiu ba kandidatu Prezidente PD, Mariano ‘Assanami’ Sabino Lopes, ba Prezidente Repúblika períodu 2022-2027, tanba ho esperansa nu’udar líder foinsa’e exelente ida no iha maturidade polítika ne’ebé di’ak hodi kaer pasta ida ne’e.
Porta-voz , Denilson Savio Marques da Silva hateten MJMND nu’udar organizasaun masa juventude ida ne’ebé existe hodi halibur foinsa’e Maubere oan tomak luta ba interese no prosperidade povu doben Timor-Leste nian. Nia aprezenta, iha tinan 2018 movimentu ne’e hamriik nu’udar forsa ida atu reforsa PD iha aspeitu oi-oin.
“Ba eleisaun presidensial tinan ida ne’e, ne’ebé públiku tomak hatene, Partidu PD nomeia ona manu aman Assanami hodi kompete mos iha eleisaun prezidensiál ba estadu ho povu ida ne’e nian mak movimentu afirma no deklara ofisialmente atu sebmete ami nia konfiansa no apoiu tomak ba kandidatu nu’udar xefe estadu 2022-2027,” hatete Porta Voz Denilson.
Tuir sira nia observasaun husi sirkuntansia hotu-hotu orgaun MJMND nian, tetu mos ba ideia ezijénsia konstituisional ne’ebé prevé husi artigu 74 Konstituisaun RDTL, aliña 1, hatete Prezidente Repúblika mak xefe estadu, simbolu no garantia indepedensia nasionál no unidade estadu, no instituisaun demokrátika regular nian, no aliña 2, Prezidente Repúblika mak aas liu forsas armadas nian.
Porta-voz ne’e salienta, Mariano Assanami líder foinsa’e ida ne’ebé exelente, iha maturidade polítika, unifikador no iha integridade polítika ida di’ak. Nia hatutan iha ámbitu kontrusaun ba dezemvolvimentu nasionál, Assanami kontinua fiar husi povu hodi partisipa nu’udar pesoalmente ida importante iha orgaun soberania rua, orgaun ezekutiva no orgaun lezislativa.
“Banati ba fundamentasaun hirak ne’e, MJMND iha esperansa no fiar katak Assanami sei sai Prezidente Repúblika iha tinan 2022-2027,” ho fiar no esperansa tomak MJMDN nian ba sira nia kandidatu Mariano Sabino iha eleisaun Prezidensiál tinan 2022 ne’e, 19/02.
“Ikus liu hakarak apela ba povu doben Timor-Leste tomak, li-liu estrutura iha baze juventude husi rai ulun to’o rai ikun, husi Jaco to’o Oecusse afirma nia pozisaun fo apoiu ba Prezidente Partidu PD ba xefe estadu tinan 2022-2027, no apela mos ba membru tomak hodi respeita kandidatura hotu-hotu nia desizaun nu’udar Timor oan, hodi partisipa iha festa demokrasia ida ne’e,” nia hakotu.
Momentu hanesan movimentu hosi Partidu Demokrátiku ne’e husu ba militantes no apoiantes hotu atu hili sira nia kandidatu Mariano Sabino iha eleisaun ne’ebé mai liu hosi númeru sorteiu 16 ne’ebé PD hetan.
