Reportajen Joselina dos Santos
Komisaun Anti-Korrupsaun (CAC) serbisu hamutuk ho Komisaun Nasionál Eleisaun (CNE), realiza semináriu nasionál kona-ba “Papél Partidu Polítku Hodi Prevene no Kombate Korrupsaun Iha Timor-Leste” hamutuk ho Reprezentante Kandidata Prezidente Republika ba Eleisaun Prezidensial 2022-2027.
Hafoin serimónia, Prezidente Komisaun Nasional Eleisaun (CNE), Jose Belo hatete sira hato’o sira nia pedidu oinsa para reprezentante kandidatu sira rona, katak diak liu labele envolve labarik sira iha laran, kampaña sira 16 pesoas ne’e mai husi background ne’ebe la hanesan bele mos liafuan sira kro’at.
“Ha’u hanoin labarik sira seidauk tempu atu rona ida ne’e, ntaun ita sente tenke prevene. CNE sei aviza no lei mos ko’alia hela prosedimentu ne’e, tanba ne’e ha’u hanoin ne’e importante,” Dehan Prezidente Jose Belo ba jornalista sira iha Salaun Laline-Lariguto CNE Kolmera, 19/02.
Nia dehan desizaun ikus ba debate ne’e, sira hakarak partisipa másimu no kandidatu sira iha direitu para fo sai sira nia hanoin, no sira nia pensamentu atu sidadaun sira rona, tanba ne’e CNE fo opsaun loloos iha loron 2 Marsu, tanba fo biban barak liu ba sira nia kampaña, maibé depois diskusaun balun hakarak iha data diferente.
“Tuir ami nia hanoin sei bele halo iha semana ida nia laran, entaun ita hakarak loron 8 Marsu bele halo debate, ita hato’o ona katak ida ne’e mak ita nia preparasaun, husu para sira bele halo reajusta sira nia data,” nia akresenta.
Nia haktuir Lei dehan kampaña 15 dias, komesa iha loron 2 Marsu. Aleinde ne’e CNE loke hela Centro Paralelu ba pasiente, estudante sira, no ba família sira ne’ebe mak hein pasiente, sira bele mai rejistu daudaun ona, karik sira sei halo hela tratamentu iha ne’e, maibe ba sira ne’ebe iha ospitál, doutór sira husi parte ospital nian tenke aprezenta ema hira mak iha ne’ebá, nune’e fasilita nafatin para oinsa sira mos fo sira nia votu.
