Reportajen Silvino Freitas
Ministériu Ensinu Superior Siénsia no Kultura(MESSK) anunsia ona lista estudante admitidu asesu ba Universidade Nasionál Timor Lorosae (UNTL), no Institutu Politekniku Betanu (IPB) tinan akadémiku 2022 total 6,352.
Tuir Prezidente Komisaun ba Asesu Ensinu Superior Publiku (KAES), Maria Filomena Lay hateten estudante asesu ba ensinu superior publiku kompostu husi rejimi 2 mak jeral no espesial.
“Rejime jerál fo oportunidade ba finalista husi ensinu sekundáriu tinan 2021 no rejime espesiál fó oportunidade ba kandidatu sira ne’ebé sei iha situasaun exesionál” dehan Maria Filomena liu husi konferénsia imprensa iha fundasaun-oriente, (25/02).
Tuir nia rejime jerál kompostu husi finalista, ensinu sekundária jerál no tékniku vokasionál ho númeru total 26.480, númeru ne’ebé prienxe boletín hodi eskolla departmentu sira 25.324 maibe 1.156 mak mak la prienxe boletín.
“Rejime jerál ne’ebé admitidu ba UNTL no IPB 4.670 kompostu husi ensinu sekundariu jeral 4.135 ensinu sekundariu tekniku vokasional 535 no la adimitidu mak 20.654” nia esplika.
Nia haktuir tan katak iha rejimi espesial kompostu husi subrejimi oportunidade fo biban ba estudante sira ne’ebé remata iha tinan 4 ba kotuk, husi ne’e adimitidu ba UNTL 527 ba IPB 29, tuir fali ba veteranu no martir sira nia oan ne’ebé admitidu mak ba UNTL 637 ba IPB 13, iha Kategoria hakbiit fo biban kbiit laek sira ne’ebé admitidu ba UNTL 350 ba IPB 40.
“Kategoria sira seluk ba hosi rejimi espesial ema ne’ebé remata ensinu superior ho tinan 23, desportista ema estranjeiru, timoroan ne’ebé remata ensinu sekundariu iha railiur, eskola internasional, ema ho difisensia no diplomata nia oan, ho adimitidu ba UNTL 65 no IPB 21” nia konklui.
