Reportajen Umbelina dos Reis
Sekretáriu Estadu Formasaun Profesionál no Emprégu (SEFOPE), liu husi diresaun nasionál empregu exteriór (DNEE), realiza serimónia despendida no asina dekarasaun ho família traballadór na’in sia nulu-resin neen (96), ne’ebé tuir planu atu aranka ba servisu iha Korea Súl iha loron 28 fulan Fevereiru 2022.
Diretór diresaun nasionál empregu exteriór (DNEE), Filomeno Soares hatete, asina deklarasaun entre família traballadór ho governu atravesa liu husi SEFOPE ida ne’e hanesan komprimísiu ida katak família prontu husik nia oan ho la’en sai husi ita nia leet no rai doben Timor-Leste ba servisu iha Korea Súl nune’e mosu problema karik parte rua ne’e bele iha responsabilidade hodi rezolve ho ulun malirin.
Nia fo hanoin ba família traballadór sira atu halo distansiamentu ba oan ho la’en sira ne’ebé atu aranka ba servisu iha Korea Súl, nune’e sira labele afeita ba moras surtu COVID-19, tanba afeita ba moras ne’e sei halo kanselamentu.
“Ba familia traballador sira, karik ita boot nia oan ho la’en haruka osan mai, tenke utiliza osan ne’e ho di’ak tanba antes hetan osan ne’e sira hasoru servisu todan, Diretor DNEE fo hanoin ba inan-aman sira, iha Salaun DNEE, Becora, 25/02.
Iha fatin hanesan família traballadór Laura de Sousa Carvalho sente orgullu tebe-tebes tanba nia alin Damião de Sousa Carvalho bele ba servisu iha Korea Súl iha área fábrika nian.
“Ho esforsu tomak nia bele hetan oportunidade husi governu liu husi SEFOPE ne’e, ohin loron família bele asina deklarasaun, ha’u nia mensajen ba alin sira mak tenke ba servisu iha Korea Súl ne’ebá labele halai ses husi sistema no kumpri nafatin regras ne’ebé mak ema fo, no kuidadu an nafatin tanba ambiente ne’ebé la hanesan,” Laura nia mensajen ba nia alin.
Iha fatin hanesan traballadór Almerino Afonso ne’ebé sei servisu iha área Peskas, hato’o, ” hau sente kontente no iha parte sorin ha’u mos triste oi-tuan tanba osan montante ne’ebé mak ami hatama ba ne’e kuaze 4.500, maibé impresta familia nia osan depois halo funan, maibé ami sente kontente ona tanba prosesu ne’ebé mak difísil ami liu tia ona”.
Nia hatutan karik ba servisu iha Korea Súl no hetan osan, fila mai nia hakarak kontinua fali nia estudu, tanba da-dauk ne’e nia ho hela nível ensinu Sekundáriu, alein de ne’e, ho osan hirak ne’e nia bele sustenta fali nia família sira.
