Reportajen Calisto dos Santos Oqui
Kandidatu Prezidente Repulika, Virgilio da Silva Guterres ‘Lamukan’ ho númeru sorteiu 12, halo kampaña diálogu ho komunidade, iha postu-Administrativu Oe-silo, RAEOA, hodi fahe nia hanoin no programa sira ne’ebe nia halo, sekarik eleitu nu’udar Prezidente Republika.
Virgilio hato’o informasaun ba populasaun sira iha suku usitasa’e iha merkadu pune fó imi nia votus ba numeru sorteu 12 ,Tamba kandidatu ida ne’e brani hateten lae ba lalaok ne’ebe la los, no hanesan prezidente ba jerasaun foun.
Nia dehan tinan 20 ona, jerasaun tuan sira kaer uku, maibe ita hotu hare ona, buat diak no aat ne’ebe sira halo ona.
Kandidatu númeru sorteiu 12, ne’e lakohi mobiliza popupalasaun atu ba kampaña iha fatin boot sira ou iha sidade, maibe mai rasik iha area remotas, atu hato’o informasaun ka vizaun ba populasaun sira ne’ebe hela iha area ne’e.
“Hau hakarak imi fó imi nia votus ba numeru sorteu 12 atu sai Prezidente, hau hakarak Timor ne’e sai fatin nebe mak fraternu liu, no fatin ne’ebè haree malu hanesan maun no alin”, dehan Virgilio iha fatin diálogu, 03/03
Nia dehan ita hotu hatene katak Oe-cusse tenke sai espellu, lalatak, lalenok ba rai boot, tamba rai Oe-cusse ne e hanesan aifunan ida kuda hela iha ita nia rai vijinu nia leet ou indonensia nia leet, ai-funan tenke buras no kapas hodi hatudu ita nia vijinu katak, rai boot iha Timor ne e hakarak independente, nia furak mak ne e no nia kapaz mak Oe-Cusse hatudu ne’e.
“Sidade labele hatudu deit iha Oe-Cusse maibe hatudu mos ba postu sira hotu, hodi hetan dezemvolvimentu ne’e mak diak. Tinan 20 nia laran estrada sei a’at nafatin, maibe tinan-tinan, ita nia osan aumenta ba bebeik maibe estrada laiha no aat nafatin, no ita nia populasaun atu lori sira nia produtu atu ba merkadu araska tanba transporte la tama ba area rural sira”, dehan Virgilio
Kandidatu Virgílio hato’o ba komunidade sira katak, ķarik suku ida ne’e mak fó votus mai hau atu sai Prezidente, mak tenke komunika ho governu hanesan ezekutivu atu ezekuta dezenvolvimentu, atu hare orsamentu ne’ebé natoon hodi hadia estrada, hodi harii centru de saúde iha suku hotu asesu lalais, hadia eskola sira atu nune’e ita nia oan sira bele asesu .
“Labele haluha tenke hili prezidente ne’ebé brani atu hato’o ba guvernu atu tau osan hodi dezemvolve iha ita nia area saúde ho setor edukasaun”, Virgilio fo hanoin ba eleitór sira
