Reportajen Adroaldo ‘Saretukau’
Kandidatu independente ba Prezidente Repúblika, Isabel da Costa Ferreira hala’o nia kampaña ho métodu diálogu hamutuk ho komunidade iha Díli-Metinaro, hodi hato’o nia kompromisu polítika ba komunidade sira katak atu liberta povu ida ne’e mak ema povu hotu-hotu presiza hetan oportunidade hanesan iha aspetu hotu, no povu tenki moris ho dignu.
Kandidatu ho númeru sorteiu 1 iha nia intervensaun katak ema hotu presiza hetan oportunidade hanesan iha edukasaun, servisu no seluk tan hodi labele husik grupu balun de’it mak sente ukun aan ida ne’e.
“Liberta povu tenke kria kondisaun ba povu hotu-hotu moris dignu iha nia rai rasik hanesan nasaun ida livre no independente, nia labele kontinua halerik nafatin tanba nia oan la hetan oportunidade ba eskola, servisu no nia kontinua kiak nafatin, grupu ida mak riku ba be-beik no riku ba be-beik ida ne’e la’os ita liberta povu, maibé ita liberta ita nia aan husi terus ne’ebe mak ita sente durante ne’e ba grupu oan ida de’it, família ida nia oan hotu-hotu hetan bolsa estudu no balu lae. Buat sira ne’e hotu ita tenke muda atu nune’e hodi hadi’a ita nia família, sosiedade no nasaun,” hatete Isabel liu hosi nia pájina ofisial Facebook, Domingu, 06/03.