Reportajen Silvino Freitas
Sekretáriu Estadu Protesaun Sivíl (SEPS) parseria ho PNTL no Plan Internasionál Timor-Leste(PITL) realiza programa alerta sedu iha kapitál Dili, hodi informa ba sosiedade atu hakmatek ho armonia hodi asegura feto, labarik-feto, ema-vulnerable, ema ho defisiénsia no idozu sira, durante períodu eleisaun prezidensiál (ElPre)
Tuir Diretór Jerál SEPS, Ismael Babo hateten alerta-sedu ne’e atu fo hanoin ba komunidade sira atu halo prevensaun ba situasaun importante sira atu kontribui ba pás ho estabilidade iha festa demokrasia durante períodu kampaña ba eleisaun prezidensiál 2022-2027.
“Ita hotu akompaña lao daudauk ona iha fatin balun halo provokasaun no fatin balun militante sira tuda malu ho ida ne’e maka SEPS liu husi diresaun nasionál prevensaun konflitu komunitáriu iha papél importante, servisu hamutuk ho parseiru sira atu fo hanoin ba ita nia komunidade sira ho mensajen sira ne’ebé importante atu bele kontribui ba paz no estabilidade” dehan Ismael iha Ministériu Interior Kaikoli,(07/03).
Nia hatutan alerta sedu ne’e sei realiza durante loron tolu kada munisípiu Dili, Aileu no Ainaru, hodi fo informasaun ba komunidade atu prevene situasaun ne’ebé akontese ba feto no labarik feto, ema vulneravel, idozu sira no ema ho difisiensia.
Entretantu Jerente Influensia PITL Laura Lopes hateten, atividade ida ne’e servisu hamutuk ho diresaun nasional prevensaun konflitu, tanba PITL servisu ba direitu protesaun labarik nunee programa ne’e importante no pertinente tebes no relevante ho servisu PITL nian.
“Programa prevensaun konflitu relevánsia tebes ho ami nia vizaun ne’ebé servisu ba protesaun labarik no lori igualdade ba labarik feto, tanba ne’e mak atividade ne’ebé relasionadu ho prevensaun konflitu ba saida de’it iha komunidade ami hakarak fo apoiu, atu sensibiliza edukasaun sívika liga ho prevene konflitu ami fo apoiu tomak” dehan Laura iha Ministeriu Interior Kaikoli.
Nia dehan tan programa alerta-sedu ne’e halao iha munispiu tolu Dili, Aileu no Ainaro atu bele sukat nia rezultadu liga ho prevensaun konflitu no sei kontinua ba munisipiu hotu.
Iha fatin hanesan reprezentante komandu munispiu Dili segundo komadante Joao Sancho Pires hateten komandu iha nia planu rasik atu halo seguransa ba kampaña no dadaun ne’e lao ona.
“Planu polisia nian iha hela maibe SEPS ho PITL hamutuk ho PNTL realiza tan atividade alerta-sedu atu halo seguransa ida diak liu ba prevensaun konflitu nian” hakotu Komadante Joao Sancho.
