Reportajen Santina Lucia da Costa
Kandidatu Prezidente Repúblika ho númeru sorteiu 6, Dr. Francisco Guterres Lú Olo, bainhira eleitu ba Prezidente Repúblika tinan 2022-2027, Prezidente ba povu tomak, serbí povu, kumpre konstituisaun no lei, harii ekonomia sustentável ba nia povu moris di’ak, no promove diálogu ho órgaun soberanu sira.
Kandidatu Prezidente Repúblika, Dr. Francisco Guterres Lú Olo, hateten Prezidente Repúblika sai hanesan ba povu tomak, eleitu husi povu para atu serbí povu tomak, ne’e knáar ida ne’ebé Prezidente Republika halo, primeiru tenki kumpre lei no konstituisaun, tenke proteje no defende polítika inkluzaun ba ninia ema sira hotu, tantu ki’ak no ema defisiénsia sira, ba nia povu tomak, harii ekonomia ida sustentável ba nia povu atu bele hetan moris di’ak, ambiente ida di’ak tebes ba nia povu, no halo relasaun institusionál entre Prezidente Repúblika ho orgaun sira seluk tenke la’o nafatin.
“Hau rasik nunka hanoin dala ida atu halo opozisaun, simplesmente hau buka de’it maka kumpre hau nia kompetensia tuir konstituisaun haruka.” Dehan, Kandidatu Prezidente Republika, Francisco Guterres Lú Olo iha ambitu inagurasaun Kampaña iha Sede Luz Clarita, 28/2.
Lú Olo akresenta ba relasaun institusionál nian entre Parlamentu Nasionál, Prezidente Repúblika ho Governu no órgaun sira seluk fiar katak sei la’o ba oin nafatin, halo kooperasaun di’ak nafatin ho orgaun estadu.
“Prezidente Repúblika ida ké hakarak kumpre de’it konstituisaun ho lei sira, hau hakarak hateten ba ita boot sira katak, hau sei eleitu ba Prezidente Republika hau sei hakruk de’it ba konstituisaun no lei sira, la hakruuk tan ba vontade partidu A ka B nian.” Realsa Lú Olo.
“Prezidente Repúblika hau rasik mós, sei promove diálogu nafatin permanente fó ba órgaun soberania sira bainhira karik iha deferénsia Parlamentu ho Governu karik, Parlamentu ho fali ba Prezidente Repúblika sei buka nafatin para atu rezolve, deferénsia polítika, deferénsia pontu de vista ne’ebé mak iha, deferénsia kona-ba asuntu ruma, Prezidente Republika sei nafatin dialogu, ida ne’e hau nia mandatu iha tinan haat nia laran hau uza duni diálogu ne’e par abele hetan solusaun ba problema.” Hateten Lú Olo.
Nia hatutan infelizmente diálogu balun iha susesu, balun ké laiha susesu, mais vontade Prezidente Republika nian para atu halo dialogu sei la lakon nafatin, tanba ne’e bainhira sai Prezidente Repúblika, kontinua nafatin halo diálogu ho partidu poltiku hotu-hotu, ho lider hotu-hotu , buka nafatin halibur sira nia hanoin, hamutuk atu bele fó liman ba malu hakat ba oin, lori ita nia rain ba oin.
