Reportajen David da Costa Gusmao
Kandidatu independente ba Prezidente da Repúblika (PR) ba períodu 2022 -2027, Felizberto Araújo Duarte, preparadu ona atu halo kampaña abertu iha Munisípiu Liquiça no kampaña sira tuir mai ne’e kandidatu sei halo door to door deit tanba kestaun rekursu.
Kandidatu independente, Felisberto Araújo Duarte dehan preparadu ona atu halo kampaña abertura iha munisipiu Liquiça iha loron 2 Marsu, iha kampaña kandidatu ne’e independen ne’ebe laiha rekursu boot entaun preferénsia atu halo kampaña ba ema barak halo iha Liquiça deit maibe restu ne’e halo door to door deit.
“Ami preparadu ona atu halo kampaña, bainrua ami atu halo uluk iha munisípiu Liquiça, no depois tanba ita ne’e kandidatu independente laiha rekursu boot, atu gasta osan barak, entaun hau nia preferénsia ne’ebe iha halo kampaña ka komísiu iha ema barak ne’e halo iha Liquiça deit, no restu ne’e ita buka door to door ka live husi facebook, para Timor laran tomak ne’e bele hatene sa programa maka ita hakarak atu koalia no halo,” informa Felisberto ba neon metin iha salaun Lalini Larigutu CNE, Segunda 28/02.
Nune’e iha kampaña ne’e kandidatu independente, Felisberto Araújo Duarte sei lori Programa rua mak hanesan reforma ekonómika, no ida maka forma justisa, no kandidatu ne’e sei lori programa ida ne’e hodi konvense eleitór sira atu bele vota ba nia.
“Ho programa hirak ne’e, hau espera katak ema vota barak, tanba hau mak kandidatu joven liu husi kandidatu sira seluk,” nia espera.
