Reportajen Santina Lucia da Costa
Kandidatu Prezidente Repúblika Númeru sorteiu 12, Virgilio da Silva Guterres “Lamukan” la’os de’it halo Kampaña maibé kandidatu ne’e mós vizita fatin istóriku Jardin eroi da patria iha Krarás hanesan lisan ida, no fatin ne’e mós reflesaun ida, Lamukan hateten Estadu tenke garantia fatin Krarás, komunidade sira asesu ba edukasaun, saude, estrada no liuliu produsaun agrikultura ba komunidade sira.
Hafoin Vizita Jardin eroi da Patria, Kandidatu Prezidente Repúblika Númeru Sorteiu 12, Virgílio da Silva Guterres “Lamukan”, hateten, Kraras ne’e fatin istóriku fatin ida ne’ebé labele haketak istoria luta povu Timor nian atu hetan independénsia. Fatin ida ne’ebé iha ninia reprezentasaun istória iha ne’e, iha ne’e mak ema bolu Bairru feto-faluk sira nian.
“Hau sente, maski laiha rekursu atu hale’u munisípiu sira hotu, maibé fatin sira hanesan Kraras ne’e hau nia lisan atu mai vizita, la’os deit mai halo kampaña koalia komunidade sira iha ne’e, pelu menus hakruk ba matebian sira ba ema sira ne’ebé sai martir ba libertasaun atu nune’e fó matak malirin ba esforsu mai hau no kandidatu sira seluk halo.” dehan kandidatu nú.sorteiu 12, iha Kraras, Munisipiu Viqueque, 6/3.
Ba matebian hotu Lamukan husu, se sira nia klamar ne’e moris duni sira kontinua luta liberta rai ida ne’e, liuliu atu fó hanoin ba lider sira ne’ebé ukun rai ne’e atu hatene dame malu, fo liman ba malu, respeita malu, ne’e mak importánsia mai to’o iha Kraras ne’e.
Lamukan subliña, Estadu ida ne’e labele haluha ninia independensia ne’e tanba kontribuisaun povu hotu-hotu nian, povu barak moris iha area rurais inklui Kraras, no fatin seluk importante, entaun estadu tenke garantia katak, fatin sira ne’e iha ne’ebe populasaun uluk senti terus, susar ne’e iha asesu ba estrada, edukasaun, saude.
Nia dehan fatin Krarás ne’e la’os sai fatin turizmu, maibé sai fatin reflesaun ba sé de’it, ukun na’in sé de’it mak atu ukun ne’e, fatin Kraras sai referensia no refleksaun, iha ne’e feto nia involvimentu rejilensia atu infrenta situasaun ne’e iha ne’e, feto sira tenki lakon laen, oan mane, iha momentu iha rai kraras ne’e, entaun sira tenki hetan atensaun husi estadu, liuliu eduka sira nia-oan feto atu sai brani hanesan sira nia inan, estadu tenki garante edukasaun, saude, liuliu produsaun agrikultura ne’ebe sai baze komunidade nian, ne’e tenki tau atensaun.
Kandidatu Prezidente Repúblika ho Númeru sorteiu 12, hafoin vizita jardin eroi da Patria iha Krarás kontinua fahe boletín no poster ba komunidade sira iha Krarás no fó edukasaun sívika ba komunidade, oinsá uza sira nia direitu hodi vota ho konxiénsia iha loron 19 Marsu 2022.
