Reportajen Umbelina dos Reis
Kandidatu Prezidente Repúblika hosi Partidu Demokrátiku (PD), Mariano Assanami Sabino hala’o nia kampaña eleitorál ba dala-12 iha munisípiu Baucau, hato’o ba militante sira katak tempu to’o ona atu jerasaun foun mak kaer hikas ukun ida ne’e, hodi dignifika pasadu hodi fo esperansa ba joven sira.
Nia hatete presiza hakotu impase polítika, ódiu no vingnasa hodi fo fali esperansa ba joven milenial sira, labele hanesan joven uluk fo aan ba mate, kastigu ba ita nia ukun rasik aan ida ne’e, maibé oinsá kria kondisaun di’ak ba sira.
“Ami ne’e uluk kedas antes sein títulu du ke sein pátria, ne’ebé labele hanoin dehan ami la aprende, iha buat rua mak forma matenek ne’e iha esperiénsia no teória, teória mai husi esperiénsia, tanba ne’e ita preparadu la’o ba oin, ita mai tanba dever responsabilidade ne’ebé kesi aan ba ita. Kandidatu Prezidente Repúblika mos iha razaun seluk, mas buat tolu importante salva mak K-RDTL, salva estadu, salva nasaun,” dehan Assanami.
Nia hatutan ha’u hamriik iha ne’e atu ko’alia konabá salva estadu, tanba 20 anos ona ita presija implementa no realiza hanoin auténtiku RDTL, Repúblika nasaun nia apelidu husi ultramariñu mai deklara 28 Novembru unilateralmente RDTL, Repúblika ne’e tenke implementa K-RDTL katak tenke salva povu oinsá povu ne’e nia moris di’ak.
Entaun oinsá ita implementa konstrusaun demokrátiku, povu ne’e mak hun povu no abut, ukun ne’e mai husi povu suli ba governu para atu servi ba fali povu, la’os ukun ne’e sai fali hanesan patraun ida, la’os sai fali kapitalista ida, wainhira povu hetan susar governu la tau matan.
Kandidatu ho númeru sorteiu 16 ne’e mensajen ba juventude Baucau atu respeita inan-aman no labele hasai lia-fuan aat hasoru líder sira seluk, nia dehan ita nia luta atu halo transformasaun kultural tradisaun lisan fiar respeita malu, ida ne’e mak agora da-dauk ita atu halo.
Iha fatin hanesan militante FRETILIN João Moreira afirma nia pozisaun hodi hamriik no apoiu PD nia kandidatu Assanami. “Jerasaun foun ohin hamriik iha ne’e mak la vota ba númeru 16 ne’e nia futuru sei nakukun, ha’u ko’alia tanba ha’u besi merah i ohin ha’u deklara ho responsabiliza tomak ha’u besi muda iha Partidu Demokrátiku” nia dehan iha Baucau Vila Antiga, 13/03
