Reportajen David da Costa Gusmao
Kandidatu Prezidente da Republika (PR) Virgílio Da Silva Guterres “Lamukan” ho númeru Sorteiu 12, afirma eleisaun ida ne’e la’os deit atu eleitu nu’udar Prezidente Republika, maibe mos tanbá eleisaun ida ne’e fo biban atu halo interaksaun ida besik liu tan ba povu.
“Mai ha’u, susesu iha eleisaun ida ne’e la’os deit atu ha’u eleitu nu’udar Prezidente Republika, maibe mos tanbá eleisaun ida ne’e fo biban ba ha’u atu iha interaksaun ida besik liu tan ho inan-aman, maun-alin, no feton sira iha território tomak, kona-ba oinsa ita bele halo Timor-Leste nasaun ida ne’ebé dezenvolvidu iha área hot-hotu. Hau sei prontu atu kontinua ezersisiu ida ne’e ba oin, iha kapasidade sa ida deit,” dehan kandiatu PR periodu 2022-2027 ne’e, iha nia ofisial facebook Gill Bolale ohin, ne’ebe neonmetin asesu iha Tersa 22/03.
Lamukan dehan nia partisipasaun iha eleisaun ida ne’e mos atu fo laran hakmatek ba líder sira husi jerasaun uluk nian, katak jerasaun foun iha ona aten brani atu diriji rai ida ne’e ho responsabilidade.
“Karik ulu-uluk ha’u tenki hateke-sa’e hodi hakilar sai ha’u nia hanoin politik ba sira, iha eleisaun ne’e fo biban ba ha’u atu hateke ba sira nia oin hodi ko’alia sai sa ida mak ha’u nia hanoin, sa ida mak ha’u nia jerasaun nia hakarak konaba rai doben Timor-Lorosa’e nia futuru no Povo Maubere nia moris. Rai no Povo ne’ebe juventude Loriku Asswa’in sira defende, la’os ho liafuan mamuk hanesan ha’u halo iha kampaíña eleitoral ne’e, maibe ho fakar-ran no halekar ruin,” tenik nia.
Nune’e mós kandidatu ne’e, fó Parabéns ba kandidatu na’in 13 seluk ne’ebe partisipa iha kontestasaun politika ida ne’e, liliu jerasaun foun sira.
“Ita nia partisipasaun kontribui ona ba formasaun politika ita nia sidadaun sira. Partisipasaun ne’ebé bele reduz demagojia hosi jerasaun uluk sira durante periudu kampaíña. Rezultadu eleisaun ne’e hatudu katak ita hotu tenki kontribui maka’as liutan, tuir ita ida-idak nia kapasidade ba edukasaun sivika no formasaun politika,” nia explika
Nia haktuir Kandidatu sira ne’ebé iha partidu politiku tenki halo formasaun politika bebeik ba kuadru sira hodi bele iha kapasidade komunikativa ho povu ka eleitoradu, inklui kapasidade atu halo kampaíña politika ne’ebé edukativa. Kampaíña ne’ebé eleva eleitoradu sira nia konsiensia hodi hili kandidatu ka partidu politiku bazeia ba programa no kompromisu politiku atu lori moris di’ak. La’os propaganda ne’ebe nakonu ho insultu ka atake pessoal. Atake pessoal, eksplora povu nia ignorância no halo diskursu hodi manipula eleitoradu nia sentimentu hodi hetan vitoria fasil, la’os demokrasia. Ne’e demagojia.
