Reportajen Umbelina dos Reis
Forum Organizasaun Naun-Governamental Timor-Leste (FONGTIL), realiza konferénsia imprensa ba deskobrementu partidu polítiku sira durante halo kampaña polítika iha loron hirak liu ba. Konferénsia imprensa ne’e aprezenta hosi Asosiasaun Halibur Difisiénsia Matan Timor-Leste (AHDMTL) no Aliansa Nasional Combate Crime infantecidio Timor-Leste (ANCITL) ba STAE no CNE atu haree ba asaun sira hosi partidi polítiku sira no husu ba partidu polítiku (ParPol) atu ko’alia programa iha kampaña, la’os insulta malu ho lia-fuan ne’ebé la edukativu.
Diretór Ezekutivu FONGTIL Valentim Da Costa Pinto, liu hosi konferensia imprensa hateten, eleisaun nu’udar festa demokrasia iha nasaun demokratiku ne’ebé sidadaun hotu-hotu atu partisipa ho livre no ezerse sira nia direitu. Sira tuir kampaña hodi hili sira nia reprezentante ba iha uma-fukun Parlamentu Nasional no membru governu liu hosi sufrajiu universal.
“Partidu polítiku 1-17 ne’ebé hetan legalidade hodi kompete iha festa demokratiku, aprezenta planu ho programa durante tinan 5 ba povu, husu ba líder halo propaganda polítiku sira ne’ebé ho linguajen edukativu la’os nakonu ho insulta malu, lider partidu polítiku sira halo propaganda polítika tenki promove unidade nasional, no husu mós ba INDICA tau matan ba labarik sira ne’ebé partisipa iha kampaña.” Diretór Ezekutivu Valintim dehan iha FONGTIL, Kaikoli, 28/04.
Nia rekomenda ba públiku no partidu polítiku sira tenki uza linguajen ho termolojia ba ema ho nesesidade espesiál no ba ema ho defisiensia sira seluk.
Iha fatin hanesan Prezidente Konsellu Fiskal FONGTIL, Inocencio Xavier hateten, partidu polítiku sira da-daun ne’e halo kampaña polítika iha fatin-fatin, maibé akontese insidente barak iha teritóriu nasional hahú hosi Oe-cuse, Viqueque, Baucau, Manufahi inklui Dili, sira hanoin katak ba lider sira hotu nia asaun no komisiu nu’udar aktu edukasional.
“Ami insiste maka’as no kondena aktu sira ne’ebé akontese direita no indireitamente durante kampaña, ami nia solidariedade ba vitima sira ne’ebé hetan tuda no estragus, no kondena mós autór sira halo asaun brutalidade hodi hakanek ema seluk, la fó espasu ba ema seluk atu espresa direitu sívil polítiku tuir konstítuisaun,” Nia dehan.
Timor-Leste presija prosesu dezenvolvimentu mak lider sira nia liafuan komunga dame ho domin, só pas mak bele lori dezenvolvimentu ba rai ida ne’e. Husu ba militante no simpatizante partidu polítiku sira ne’ebe iha palku uza iha momentu ne’eba labele trata ema.
