Reportajen Umbelina dos Reis
Xefe suku Laisorulai de Baixo, Julio Farkhus Pinto ezize governu liu hosi Komisaun Administrasaun Fundus infra-esturtura (KAFI), atu rehabilita lalais estrada ligasaun unidade 6 iha Postu Administrativu Quelicai, Abafala to’o Defalasi tanba difikulta transporte públiku no risku boot tebes iha tempu udan, wainhira atu halo viajen ba munisípiu Baukau.
Líder komunitáriu ne’e hatete, motorista sira ne’ebé halo movimentu ne’e, kareta hali’is tuun sa’e, ida ne’e difikulta tebes ba kondutor ho pasajeirus no halo sira trauma no balun dezmaia, wainhira viajen husi Quelicai unidade 6, ba Baucau, se wainhira hetan asidente ruma ne’e fo risku ba ema nia vida. Tanba ne’e mak ami autoridade lokal ezije ba ministériu liu-liu KAFI, bele rehabilita lalais iha tinan ida ne’e.
“Se lae loron ruma mak kondutor ka pasajeirus sira hetan dezastre, mak ministériu sira ne’e foin hakfodak halai tuun sa’e hanesan laho tama sala dalan, tanba ida ne’e mak ami ejize nafatin para parte relevante sira hadi’a lalais estrada hodi fasilita komunidade sira, tanba iha povu mak iha governu, iha povu mak iha parlamentu, iha povu mak iha estadu. Se agora povu mak na’in ba estadu maibé nunka mais tau prioridade ba povu nia prekupasaun sira ne’e, signifika ita mak hamate ita nia povu,” tenik Julio Farkhus Pinto ba Neon Metin via telefone, 16/03.
Nia hatutan, ami ezije nafatin ba Primeiru Ministru, tanba governu fo ona konfiansa ba kompañia Niseles hodi halo suruvey ba estrada nia kondisoens, liu-liu ami ezije ba Vise Primeiru Ministru, tanba nia mak toma konta liu hosi KAFI ho ADN, se nia lakohi tau prioridade ba estrada diresaun husi Abafala to’o mai Defalasi ne’e, signifika ministériu la iha tenderizasaun ba estrada.
