Reportajen Adroaldo “Saretukau”
Kampaña daruak ho tipu diálogu, kandidatu Prezidente Repúblika (PR), Dr. Ramos Horta hamutuk ho eleitoradu sira iha munisípiu Liquiça, Prezidente Partidu Demokrátiku (PD) Mariano Assanami Sabino husu ba joven sira, fo votu konfiansa ba Dr. Ramos Horta atu aselera joven millennial nia mehi, no sosiedade Timor sai sosiedade ida dijitalizadu no sivilizadu iha era globalizasaun, liu hosi projetu kabu submarinu (fibra ótika).
Assanami husu ba joven millennial sira ne’ebé ko’alia programa fiber optic (kabu submarinu) ne’ebé atu fasilita joven dijitál, joven ne’ebé tenke koñese teknolojia atu fo votu ba Horta ne’ebé iha esperiénsia no koñese teknolojia antijimente, uluk kedas kaer telefone hodi realiza mehi ne’e.
“Tanba ne’e ha’u husu nafatin ba movimentu, joven sira hotu para atu nafatin apoiu i iha esperansa ba ida ne’ebé mak koñese liu ona teknolojia, uza teknolojia, uza ona, agora da-dauk to’o Covid-19, nia bele halo konferénsia ho fatin bar-barak, rai bar-barak, halo komunikasaun ho Prezidente lubuk ida uza teknolojia mak Dr. José Ramos Horta,” Assanami salienta ba eleitoradu sira iha Liquiça, Domingu, 03/04.
Líder PD husu povu tomak ne’ebé apoiu ona nia iha primeira volta atu apoiu hikas Horta hodi sai Prezidente tanba ho nia esperiénsia bele transforma lais sosiedade Timor ida ne’ebé sivilizadu iha era dijitalizasaun. Nia hatete imi nia votu sei fo nafatin esperansa ba imi, imi nia votu ne’e sei la saugati.
“Tanba ne’e ita tenki apoiu para atu dijitaliza ita nia sosiedade, imi hotu nia mehi, imi hotu nia hakarak, atu dijitaliza i atu oinsá mak Timor-Leste ida ne’ebé mak transforma sai sivilizadu uza teknolojia i tama iha era globalizasaun ne’ebé mak ohin ita hasoru mak ida ne’ebé koñese globalizasaun mak Prezidente Dr. José Ramos Horta,” Assanami hato’o.
