Reportajen David da Costa Gusmao
Eleitór sira nia lian bai ha kandidatu Prezidente Repúblika nain rua, se karik ida maka sai eleitu, no serbisu hamutuk ho estadu no governu, hodi kria kampu traballu ba joven sira tanba iha Timor-Leste joven barak sei dezempregu.
Eujedio dos Santos Filipe, (34), nu’udar eleitor ida espresa nia hanoin, Timor-Lleste hasoru problema barak, liuliu iha dezempregu ho ida ne’e lideransa sira presiza tur hamutuk, hodi tau hanoin ida para bele hadia nasaun ne’e ba iha futuru
“Tanba ita nia nasaun emfrenta probelma barak liu iha dezempregu iha seitor edukasaun, saude, infraestrutura, mos sai problema boot iha ita nia nasaun. Entaun ho Prezidente foun sei koopera no serbisu hamutuk ho governu, atu hadia problema sira ne’e liuliu iha edukasaun, saude, infraestrutura no kria kampu traballu, tanba kada tinan joven sempre aumenta entaun dezempregu mós sempre aumenta ba beibeik”, dehan Eujedio hafoin ezerse nia diretu votus iha sentru votasaun eskola SD fomentu II, Tersa 19/04.
Iha fatin hanesan elitor Delta dos Reis (27), Timor-Leste ne’e emfrenta hela problema sira hanesan dezempregu, edukasaun, saude, infraestrutura, no povu barak maka sei sura maske ukun an ona iha tinasn 20 ona.
“Hau haree Timor emprenta hela problema barak, hanesan dezempregu, laiha kampu de traballho, edukasaun, saude no iha area rural mos sei preokupa ba estrada, bee moos, ema barak maka uma laiha no hahan menus, maibe hau espera ita nia Prezidente foun bele serbisu makaas ho governu sira, atu bele hadia povu nia preokupasaun sira ne’e,” nia dehan.
Alende ne’e mós eleitor Deonizio Arjenio Abel Veigas (25) dehan problema sira ne’ebé maka Timor hasoru mak lideransa sira la hamutuk, la hanoin ba povu nia moris no lideransa sira gosta maka hatún malu, bainhira iha sira nia kampaña sira promote dehan kria kampu traballu maibe sai tiha Prezidente la kumpre sira nia promesa.
“Iha Timor ita haree joven barak maka sai dezemprigu tanba laiha kampu de traballu, ho ida ne’e hau nia hakarak governu tenke presiza kria kampu de traballu ba jovens sira atu bele buka sira nia moris. Nune’e mos prezidente mós presiza konvense governu hodi bele investe iha edusaun atu nune’e estudante sira mós iha kulaidade ne’ebé diak, saude, imfraestrutura sira,” nia dehan.
Eleitor Deolinda Marsal Belo (24) espresa nia opiniaun katak, Timor ne’e konsidera hanesan nasaun foun ho ida ne’e buat barka mak nasaun ne’e presiza hadia, maka kualidade edukasaun, kualidade saude, asesu ba iha estrade, bee moos , eletrisidade tanba haree povu barak maka sei hasoru problema hirak ne’e.
Hau hanoin, ita nasaun foun ema hot-hotu ninia interese ema no lider balun no politiku balun interse ba koletivu ne’e menus tebe-tebes maibe sira nia interese pesoál no familiarizmu ne’e makaas, ne’ebé hau hanoin buat hirak ne’e ita presiza hadia, espera katak kandidatu prezidente foun tian ida ne’e nia, presiza haree buat sira ne’e, maske ne’e laos Prezidente nia serbisu maibe hau espera katak ita nia Prezidente ne’ebe eleitu, uza nia kompeténsia atu bele serbisu ho estadu no governu atu bele hadia problema iha rai laran,” nia esplika.
Nune’e Deolinda dehan iha Timor-Leste ne’e númeru dezempregu ne’e barak tebe-tebes, no fo impaktu ba jovens sira no joven sira ba hotu rai liur. Iha kampaña kandidatu sira promesa katak sei halo kopera ho rai liur hodi haruka joven ba serbisu iha ne’ebá, “tuir hau nia hanoin lolos ne’e sira buka razaun tanba sa maka ema ba rai liur barak loos? Ita fila fali bao in tanba dezempregu barak,, se dezempregu barak entaun sira kria kampu de traballu ba ita nia ema sira ne’e,”.
“Hau espera katak kandidatu nain rua ida ne’ebé maka eleitu ba Prezidente iha períodu 2022-2027, sira bele sai aman ne’ebé maka diak ba nasaun no responsabilidade ba povu nia moris no hametin estabilidade no paz iha ita nia nasaun ida”, nia hato’o nia esperansa
