Reportajen Santina Lucia da Costa
Primeiru Ministru, Taur Matan Ruak lamenta tebes ho membru VIII Governu Konstitusionál, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo ne’ebé halo keixa ba Ministériu Públiku (MP) hasoru jornalista no Xefe Redasaun Hatutan.com Francisco Belo Simões da Costa.
Xefe Governu hateten asuntu ida ne’e hafoin halo primeiru enkontru semanál ho Prezidente Republika, Dr. José Manuel Ramos Horta iha Palásiu Prezidensiál Nicolau Lobato, Bairu-Pite, Kinta-Feira ne’e.
“Primeiru Hau seidauk hatene. Segundu hau lakohi tama asuntu ne’ebé buat justisa nian, maibé ida ne’e akontese hau lamenta, hau la hatene tanba saida, razoeñs saida, hau hanoin, hau nia hakarak ita boot sira livre halo kobertura. Ida ne’e mak hau hakarak.” Hateten, Primeiru Ministru, Taur Matan Ruak, loron, Kuarta-Feira, 26/5.
Primeriu Ministru, dehan, Notisia hirak ne’ebe jornalista sira fó sai reflete realidade no reflete ba situasaun ne’ebé Timor-Leste iha.
“Ezatamente ida ne’e mak ita boot sira baibain halo, hau hanoin ida ne’e kazu ida saida uituan, mais depois hau buka hatene depois hau saida.” Dehan Taur.
Kona-bá ho komportamentu ne’ebé hatudu hosi ninia membru Governu ne’e, karik iha sinál atu limita liberdade média sira nian iha Timor-Leste, Taur dehan la limita liberdade média, tanba ida ne’e kompromísiu Estadu nian ne’ebé hakerek tiha ona iha Lei inan Konstituisaun RDTL artigu 40 kona-bá Liberadade Imprensa no artigu 41 kona-bá Liberdade Espresaun ninian.
“Laiha, la’e. Ita-boot hatene liberdade Imprénsa ne’e komprometidu hosi Estadu, la’ós de’it membru Governu nian. Ne’e Estadu nian tomak, purtantu ne’e iha ita nia Konstituisaun, ema hotu-hotu tenke kontribui ba ida-ne’e. Tanba ne’e mak ita boot sira sé haree, ita sé calhar um dos paises iha Azia, melhor iha ne’e. Press Freedom, ka liberdade de imprénsa ne’e. Ha’u parabeniza ita-boot sira, ne’e signifika katak, ita intende malu di’ak, ne’e kapás no parabens.” realsa PM Taur.
