Reportajen Silvino Freitas
Relasióna ho lei saláriu minimu ba traballador sira ne’ebé dadaun ne’e sai nafatin preokupasaun governu, kabe ona servisu ba parte kompetente iha governu nian, atu estuda tanba salariu minimu iha seitor publiku mak iha impaktu ba osan veteranu nian, nune mos husi parte sosiedade sivil submete ona pareser lubuk ida ba parlamentu no governu, maibe hetan rejeisaun iha Konsellu Ministru.
Diretor FONGTIL Valentim da Costa dehan, iha tinan kotuk komite nasional sira ne’ebé kompostu husi sindikatu traballu SEFOPE ho seitor privadu, halo ona pareser lubuk ida ne’ebé submete ba parlamentu no governu, atu desidi ba salariu minumu atual husi $115 muda ba $150, maibe desizaun husi konsellu ministru kontinua la aprova rekomendasaun ida nee.
“ami konsidera tenke iha mudansa ruma konaba ida nee mais diak liu ita tenke hanoin ona konaba aplika salariu minimu bele dehan 150 maibe kondisaun merkadu ne’ebé la adekuadu mak nafatin afeta ba kapasidade kompras nian tanba nee governu bele hanoin konsidera ida nee tau iha pratika” dehan Valentim iha salaun Canosa Has-Laran, (21/07).
Nia dehan tan, tinan hira ba kotuk bainhira tama iha faze kampana politika partidu hotu koalia mudansa traballador iha timor leste, nune laos deit iha salariu minimu maibe presiza mos koko atu atu traballador bele asesu ba seguransa social ema ne’ebé fo servisu lakohi selu ida nee tenke sai mos asuntu ida laos iha salariu presiza kondisaun ne’ebé bele permiti atu traballador sira bele hetan, justisa ne’ebé bele asegura direitu ba traballador sira ho dignu no adekuadu.
Enkuantu Vise-Primeiru Ministru no Ministru Koordenador Asuntu Sosial Mariano ‘Asanami’ Sabino dehan, konaba salariu ba traballador nee akontese iha fatin rua, ida husi setór públiku, no ida husi setór privadu , nune husi setór privadu la dun iha impaktu, maibe husi setór publiku sei fo impaktu ba salariu ba veteranu sira nian, nunee IX governu enkamina ona ba iha parte kompetente atu bele estuda hela.
“iha prosesu finansa nian sei tetu no koalia ho seitor privadu, tanba salariu minumu iha rua ida mak iha liur no ida mak governu nian, parte governu nian sei fo impaktu mos ba osan veteranu nian maibe iha liur nee lae, sira husi parte kompetente mak estuda hela iha konsellu ministru ami orienta hela depois ita sei haree” dehan Asanami.
