Home Notisia PR Husu Ba Timor Oan Labele Fiar Lia Falsu Husi Grupu Balun...

PR Husu Ba Timor Oan Labele Fiar Lia Falsu Husi Grupu Balun Hodi Ba Serbisu Iha Rai Li’ur

1951
0
Presidente Republika iha igreja Becora. [Foto: Joselina | 26.06.2022]

Reportajen estudante estajiadu UNTL, Joselina dos Santos

Prezidente Republika, Dr. José Ramos Horta husu ba timoroan sira, labele fiar  lia falsu sira ne’ebe  ema indivíduu ka grupu balun, habosok joven sira ba serbisu iha rai liur, maibe fiar ba instituisaun governu nian ne’ebe rejistu ho processional no legal, atu nune’e labele mosu problema bainihra ba serbisu iha rai liur.

Prezidente Republika, Dr. José Ramos Horta hatete Timor-Leste ukun an ona ba tinan 20, maibé sei iha difikuldade barak, tanba ne’e joven barak mak ba liur hodi buka moris. La’os agora mak joven sira ba serbisu iha rai liur, maibé iha tinan 1975 joven lubuk ida mak halai ba Australia no Portugal durante Guerra sivíl no mós iha okupasaun nia laran.

“Ohin timoroan sira ne’ebé iha rai liur, liu-liu iha Australia balu médiku formasaun no balu kontinua universidade, kursu direitu to’o balu sai advogadu siéntista iha Amerika, Portugal no Europa inklui iha Brazil,  balu konsege sai Doutoramentu e Post-Doutoramentu”, dehan, Prezidente Republika Jose Ramos Horta  iha nia diskursu iha Igreja Becora Sagradu Korasaun de Jesus, 26/06.

Prezidente hatutan ita aprende ona iha rai laran tenke ba mundu, maibe difikuldade iha rai laran ne’e normal, tanba rai ne’e 20 anos independensia no joven liu tan, atu harii Estadu Direitu Demokrasia Ekonomia nee lori tinan lubuk ida nia laran. Ne’e duni ita hotu nia kompromisu no esforsu, ba sira ne’ebe ba rai liur, loron ruma sira sei fila ho matenek diak liu tan, tanba sira aprende lingua no serbisu oi-oin iha liur ne’ebe iha rai laran la konsege aprende.

“Husu ba timoroan sira tenke kuidadu ho ema ne’ebe bosok imi dehan fo serbisu iha Dubai ,labele fiar promete falsu sira, tanba daudaun ne’e ha’u rasik simu komunikasaun husi Alemaña katak grupu nain 13 ne’ebe ema bosok sira selu $5.000, hodi serbisu iha Alemaña maibe realidade laiha, agradese tanba sira konsege kontaktu entaun ha’u kontaktu fali ho embaixada Bruxelas konsege haree joven sira ne’ebe ema bosok”, Prezidente informa.

Prezidente agradese mós ba Polisia Investigasaun Kriminal, tanba bele serbisu ho di’ak, hodi kaptura kedas autór ne’ebe bosok timoroan sira ba serbisu iha Dubai. Nune’e kuidadu labele fiar tanba  iha organizasaun ne’ebe atu trata ema ba rai liur rejistadu profesional no legal la’os kualker grupu kualker ema.

Print Friendly, PDF & Email

LEAVE A REPLY

Please enter your comment!
Please enter your name here