Reportajen Zeka Nunes
”Kada tinan RAEAO tau $1 millaun ba indenizasaun refere, maibé to’o agora RAEOA seidauk bele selu tanba presiza konfirma no verifika dadus husi SNC ba rai afetadu sira”. Arsenio Bano
Ekipa Oxfam ho parseiru Rede ba Rai marka audiénsia ho Presidente Autoridade Rejiaun Administrativu Especial Oe-cusse Ambeno (RAEOA) no Sekretáriu Rejionál Terras no Propriedade hodi ko’alia konaba Planu RAEOA nian ba indeniza komunidade nia direitu ba rai, ne’ebé afeta husi projetu ZEESM.
Iha enkontru ne’e Koordenadór Rede ba Rai, Pedrito Vieira no Asesora Programa Feto no Rai husi Oxfam, Ines Martins aprezenta komunidade afetadu sira nia preokupasaun konaba direitu ba indenizasaun ba rai, uma no ai-horis sira ne’ebé afeta husi mega projetu ZESSM, hanesan konstrusaun Rezidénsia autoridade RAEOA iha Fulolo, otél Fitun 5 iha Oeupu, aeroportu Palaban, Planta eletrisidade Inur Sakato no alargamentu estrada. Maske rai no propriedade sira ne’e ZESSM foti durante tinan 7 ona, maibé komunidade afetadu sira seidauk hetan indenizasaun.
Hatan ba preokupasaun ida ne’e, Prezidente Autoridade RAEOA Arsenio dehan katak autoridade RAEOA aloka orsamentu atu indeniza komunidade sira nia rai no propriedade sira dezde 2021 no 2022.
”Kada tinan RAEAO tau $1 millaun ba indenizasaun refere, maibé to’o agora RAEOA seidauk bele selu tanba presiza konfirma no verifika dadus husi SNC ba rai afetadu sira, no hein rezolusaun ka dekretu lei husi Ministériu Justisa ne’ebé aprova husi Konsellu Ministru nu’udar baze legal ba indenizasaun, ezemplu padraun presu rai,” tenik Arsenio Bano, 14/07 2022
Autoridade RAEOA liu husi Sekretáriu Rejionál Terras no Propriedade mos husu ba Sosiedade Sivil, hanesan Rede ba Rai no Oxfam atu tulun hodi sosializa lei rai ba komunidade sira no halo akompañamentu ba komunidade bainhira autoridade halo kompensasaun ba komunidade sira.
Iha fatin seluk reprezentante komunidade afetadu señora Regina Ola liu husi enkontru komunitáriu ho ekipa Rede ba Rai no Oxfam konfesa nia deskontentamentu ba autoridade sira tamba sira nunka tun ba komunidade hodi fahe informasaun ba sira.” Dala barak ona ami konvida no hakarak hasoru ho Presidente Autoridade no Sekretáriu Rejionál Terras no Propriedade maibé sira nunka hakarak atu hasoru ho ami hodi koalia konaba indenizasaun ida ne’e.” Regina akresenta.
Ekipa influensia no advokasia ba rai ne’ebe partisipa iha enkontru ne’e kompostu husi Rede ba Rai no Oxfam, Presidente Autoridade RAEOA, Arsenio Paixão Bano, Sekretáriu rejionál Terras no Propriedade, Sekretaria Rejionál Edukasaun no Solidariedade Sosiál.
