Reportajen Adroaldo “Saretukau”
Organizasaun Resistência Nacional dos Estudantes de Timor-Leste (RENETIL) hala’o serimónia ofisiál termu de entrega ba ekipamentu eletróniku, Camera Canon XF 605 hosi ekipa Serviços de Apoio Sociedade Civil e Auditória Social (SASCAS).
Molok hala’o termu de entrega ne’e, RENETIL ho SASCAS halo inspeksaun konjunta ba ekipamentu eletróniku refere. Ba aktividade ne’e, João Freitas nu’udar Tékniku Subvensaun Públiku SASCAS nian hatete, agradese tanba bele envolve SASCAS iha prosesu verifikasaun ekipamentu eletróniku ba loron ohin, ida ne’e di’ak tebes iha prosesu tranparánsia no akuntabilidade nian.
Nia esperansa ho material ne’ebé ohin oferese ho apoiu SASCAS, ida ne’e ajuda Organizasaun RENETIL liu-liu hosi Neon Metin oinsá bele uza material sira ne’e ho responsabilidade, liu-liu ba atinjimentu hodi fasilita informasaun ba públiku no halo advokasia.
“SASCAS mos iha esperansa katak ba oin RENETIL ho Neon Metin bele kontinua halo servisu ne’e i oinsá atu uza média ne’e hanesan atu fasilita informasaun sira, i liu-liu halo advokasia ba situasaun ka isu-isu aktual ne’ebé mak ita nia komunidade no rai ne’e hasoru,” dehan Tékniku Subvensaun Públiku SASCAS, João, iha Sede RENETIL iha ámbitu termu de entrega, Kuarta-feira, 12/10.
Iha parte sorin, Primeiru Vise RENETIL, Francisco JMF Belo “Lires” hato’o agradese ba SASCAS ne’ebé apoiu ona orsamentu ba RENETIL hodi sosa ekipamentu eletróniku refere. Nia agradese mos ba prezensa SASCAS nian iha serimónia ida ohin.
“Halo inspeksaun konjunta ne’e hamutuk ho reprezentante SASCAS ho RENETIL ita halo inspeksaun, halo verifikasaun, ikus mai ita aprova ekipamentus tuir duni espesifikasaun ne’ebé ita hakarak,” dehan Primeiru Vise RENETIL, “Lires” hafoin serimónia termu de entrega.
Nia hatutan, ekipamentus eletróniku ne’e RENETIL nian no sei fo ba Média Neon Metin hodi bele mellora di’ak liu tan servisu média ni-nian.
“Ho ekipamentu ne’e ita espera katak, hosi ekipa Neon Metin nian atu bele utiliza sasan sira ne’e ho responsabilidade i bele kuidadu di-di’ak ekipamentu sira ne’e, atu bele hala’o nia misaun hanesan média atu bele kontribui ba dezenvolvimentu sosial, polítika, ekonomia iha rai laran,” Primeiru Vise RENETIL “Lires” hakotu.
RENETIL hetan apoiu hosi SASCAS ho montante orsamentu $10.750 hosi orsamentu anu 2021 nian hodi hola camera Canon XF 605 ho ekipamentu seluk tan. Prosesu tenderizasaun ne’e RENETIL halo ho prosesu kleur no ohin kompañia aprezenta material hirak ne’e ba RENETIL no RENETIL rasik konvida SASCAS nu’udar osan na’in hodi observa no konfirma katak material hirak ne’e iha duni.
Aktividade ne’e hala’o iha Sede RENETIL, Farol Díli hamutuk ho ekipa SASCAS hanesan ofisiál IT, ofisiál Aprovizionamentu, Tékniku Espesializadu no Monitorizasaun no Tékniku Subvensaun Públiku, Diretor Kompañia Kuruorasa, Primeiru Vise RENETIL ho membru sira inklui Média Neon Metin.
