Reportajen Umbelina dos Reis
Asaun estudante no Aliansa Maubere Nacional (AMN) kontra proposta husi Parlamentu Nasional hodi sosa kareta no laptop ba deputadu sira, hetan duni aseitasaun hodi hapara proposta refere.
Prezidente Parlamentu Nasional, Aniceto Longuinhos Guterres Lopes, aseita estudante sira ne’ebé halo manifestasaun hodi hapara sosa kareta ba deputadu sira no sujere revé polítika apoiu transporte ba deputadu sira.
“Ha’u konvida deputadu sira, atu revé tanba polítika sosa kareta ba deputadu sira, tanba hahú sala tiha ona, ha’u apoiu estudante no joven sira ne’ebé halo manifestasaun,” hatete Prezidente PPN iha diskusaun Orsamentu Jerál Estadu 2023 iha jeneralidade loron 9 Novembru 2022.
Prezidente Parlamentu Nasionál dehan, Governu hakat tiha ona ho polítika ida ba kargu xefia sira, atribui de’it subsídiu transporte, la fó karreta. Lei estatutu deputadu sira hatete katak deputadu sira iha direitu ba transporte, la signifika tenki hetan kareta. Interpretasaun ida dehan, deputadu sira iha direitu ba kareta hahú 2007 iha segunda legislatura, ne’e interpretasaun ne’ebé sala.
“Uluk FRETILIN kontra sosa kareta ne’e, ha’u xefe bankada, ha’u hamriik iha oin kontra sosa kareta, loloos atribui de’it subsidiu transporte,” dehan PPN Aniceto.
