Reportajen Umbelina dos Reis
Iha Konferénsia Nasional CNC! Konabá ratifikasaun konvensaun kontra halakon ema ho forsada, Diretor AJAR, José Luis Oliveira husu ba governu Indonézia atu informa ba governu Timor-Leste komandante Nicolau Lobato no Daitula inklui sira seluk ne’ebé lakon vida durante okupasaun Indonézia nia paradeiru mate iha ne’ebé.
Iha Konferénsia Nasional CNC nian, Diretór AJAR José Luis Oliveira hato’o preokupasaun relasiona ho harii estátua Nicolau Lobato iha Comoro, Díli, maibé eroi ne’e nia pardeiru mate agora ita la hatene. Nia dehan, nu’udar país independente ita nia dignidade tau iha ne’ebé, uluk ita halo ai-kose ho supermie la hatene maibé ita ukun rasik aan tiha, ita seidauk bele esforsu buka hetan nia mate ne’e iha ne’ebé, tanba kestaun lakon forsadamente ne’e sériu.
“Timor ukun aan 22 anus, ita la husu buat barak ba Indonézia maibé ita husu ba Indonézia informa hela ema sira ne’ebé lakon, mate hotu ona ne’e, tanba tuir lei ema ruma lakon sedauk iha gia de óbitu ne’e ita konsidera nia bele mate, maibé kontinua lakon ne’e violasaun direitus umanus kontinuada, tanba ko’alia konabá violasaun direitus umanus ne’e kontinua nafatin eziste iha rai ne’e,” dehan Diretor AJAR, José Luis Oliveira.
Diretor ne’e salienta katak kestaun polítika nia seriedade ne’e to’o ona ne’ebé, mekanizmu seriedade agora ne’e sofre, tuir sira nia observasaun hodi akompaña delegasaun nia servisu. Nia dehan, ajenda projetu ita interese atu ba buka ema forsadamente lakon maibé ba harii fali Pusat Budaya Indonesia.
“Ida urjente interese ita nian, ita la luta hodi realiza, maibé ita husik Indonézia mak determina fali ajenda, Timor ukun rasik aan 22 anus, maibé kontinua la halo esforsu sériu, mak ita harii estátua Nicolau Lobato no Daitula nian, mak ita sedauk hatene nia paradeiru iha ne’ebé ne’e saugati de’it,” Diretor AJAR preokupa.
Iha fatin hanesan Diretor Ezekutivu CNC, Hugo Maria Fernandes, hato’o katak tuir lei direitus umanus ho prinsípiu internasional, ema lakon forsadamente ne’e kategoria krime kontra umanidade no la iha limitasaun tempu ba estadu sira atu kontinua hare asuntu ne’e. Nia dehan, atu hahú halo esforsu ratifika konvensaun konabá ema lakon forsadamente.
Relatóriu CAVR Chega! rejista asuntu ema lakon ne’ebé akompaña mos violasaun konabá oho ema, Chega! regista kuaze ema 16.000 to’o 20.000 mate durante períodu konflitu.
