Reportajen David Da Costa
Vizita Estadu husi Prezidente Repúblika, José Ramos-Horta bá Singapura diferente entre iha loron 6 to’o 11 Novembru, diferente ho vizita estadu antes ne’e, tanba envolve joven balun husi Liquidoe, Munisípiu Aileu, Pessoál Seguransa Sívil ida, no Xefe Aldeia 03 Fatukama, Suku Meti-aut, Munisípiu Díli.
‘’Ha’u konvida mos Xefe Aldeia 03 Fatukama (Metiaut), Seguransa sivíl ida ne’ebé kleur ona iha ha’u nia rezidénsia inklui jóvem ida husi Lekidoe, Aileu. Ha’u sei halo nune’e nafatin, lori autoridade lokál iha territóriu nasionál hodi koñese liu tan servisu Prezidente Repúblika iha rai-liur no halo komparasaun entre rai rua. La’ós de’it autoriedade lokál, maibé bele akontese mos ba manorin ka negosiante ambulante ida konforme rai ne’ebé besik-besik,’’ esplika Prezidente Republika Ramos Horta iha komunikadu imprensa ne’ebé Neon Metin asesu iha loron 11/12.
Alémde ne’e, deputadu na’in lima husi bankada governu no opozisaun mós integra iha delegasaun Xefe Estadu nian, hodi observa servisu Estadu no projeta konsensu iha Órgaun Soberanu.
‘’Ha’u nia vizita estadu ne’e, sempre akompaña husi Deputadu sira, ne’e atu dehan sira (deputadu) kontinua akompaña direta vizita estadu, hodi nune’e bele apoia nafatin Xefe Estadu nia atividade no harii konsensu entre instituisaun soberanu’’ Subliña Xefe Estadu.
Autoridade lokál ne’ebé inklui iha delegasaun ne’e sente kontente ba oportunidade, hodi observa dezenvolvimentu iha rai avansadu sira.
‘’Ha’u sente kontente no ba dala-uluk hanesan Xefe aldeia ida hetan konvite hodi akompaña Xefe Estadu, mai vizita estadu iha rai-liur. Apresia tebes tambá bele haree rai dezenvolvidu sira seluk, haree mos moris populasaun nian, sensibilidade populasaun nian, nune’e ha’u husu ba Prezidente Repúblika atu kontinua nafatin hodi lori autoriedade lokál atu akompaña,’’ tenik Xefe Aldeia 03 Fatukama, Lúcia Araújo.
Hafoin observa dezenvolvimentu iha Singapura, líder komunitária ne’e, husu ba ema hotu hodi fó liman ba malu no ba líder sira, atu dezenvolve rai Timor-Leste.
Gaspar Soares nu’udar Seguransa Sivíl durante tinan 12 destaka iha rezidénsia privada Prezidente Repúblika no jóvem ida husi Aileu, Anacleto de Jesus do Rego agradese ba oportunidade hodi hatene servisu Xefe Estadu iha rai-liur.
Durante iha Singapura, sidadaun na’in tolu, akompaña vizita offisiál ba Palásiu, hodi hasoru malu ho Prezidente Reúblika no Xefe Governu repúblika Singapura inklui jantar estadu no vizita bá instalasaun projetu transformasaun bé fo’er ba bé mineral.
