Reportajen Joanina Casamiro
Reprezentante Autoridade Munisipiu Dili, Justina de Jesus Amaral, hateten hamutuk hapara violénsia kontra feto no labarik, tanba ne’e krime publiku. Feto maluk sira ne’ebé hetan violénsia bele hato’o lalais ba organizasaun sira ne’ebé maka toma konta ba kazu violénsia.
“Iha konsentrasaun ema barak husi 13 munisípiu hamutuk iha ne’e, ho nia karateristika ne’ebé la hanesan entaun hamosu kompleksidade no hamosu violénsia barak iha kapitál, oras ne’e dadauk buat hotu karun, entaun hosi ida ne’e mós bele hamosu violénsia iha uma laran. Atu hapara violénsia mai ita hamutuk hapara Violénsia kontra feto no labarik tanba ne’e Krime Públiku,” Dehan Reprezentante Autoridade Munisipiu Dili, Justina liuhusi diskursu iha Jardim ponte Habibie, kuarta 14/12.
Nia haktuir iha feto maluk sira ne’ebé hanesan dona da casa ou sai hanesan jestora iha uma laran, kuandu ekonomia la sufisiente atu haree ba oan nia eskola no nesesidade uma laran, bele mosu mós violénsia psikolojia, bele hamosu fiziku iha uma laran tanba dalaruma fen sira ka oan feto sira iha ezizensia barak, dalaruma nia parseiru ka maluk mane sira bele halo violénsia ba feto.
Nia salienta husi Autoridade Munisipiu Dili bele hamenus ona violénsia domestika iha uma laran, liu-liu iha kapital Dili, no hakarak hato’o mos Autoridade Munisipiu Dili nakloke atu bele halo koordenasaun ho parte relevante bele halo servisu liu-liu kontra violénsia kontra feto.
