Reportajen Estajiada Agustinha Amaral
Ministériu ba Asuntu Parlamentár no Komunikasaun Sosiál (MAPKOMS) realiza avaliasaun anual ba funsionáriu sira iha atividade tinan 2022 nian, hodi avalia sira nia dezempeñu servisu ba oin.
“Iha atividade ida ne’e tanba ita tinan tomak ida agora, ita atu remata ona tinan 2022 nian, entaun MAPKOMS halo avaliasaun dezempeñu ida ba funsionáriu sira to’o dirijente sira, husi Diretor Jeral, Diretór Nasionál, Inspetór no Diretores sira hotu,” hatete Ministru MAPKOMS, Francisco Martins da Costa Pereira Jerónimo ba jornalista sira iha Salaun Delta Nova, kuarta-feira (21/12).
Nia hatutan, Gabinete Parlamentar nian hakarak hamutuk halo avaliasaun ida hodi hatene saída de’it mak sira nia dezafiu no saída mak sira nia obstakulu, i buat ne’ebe sira halo di’ak ona sei kontinua halo nafatin no buat ne’ebé seidauk di’ak sira esforsu atu hadi’a iha tinan 2023.
Portantu, vantajen husi avaliasaun ne’e atu hatene sira nia frakeza forti ka fraku ne’e iha ne’ebé, atu nune’e sira bele hadi’a hodi bele la’o ba oin di’ak liu, soru mutu sira ne’e importante para bele ko’alia husi fuan ba fuan no fo liman ba malu hodi hateke ba oin saida mak ita atu halo, nia dehan.
“Ba oin ami tenki implementa saída mak ami halo ona atu nune’e halo metin liu tan Ministériu i sira ne’ebé ladi’ak ami soe tau tiha ba kotuk hodi labele fo difikulta, i ami hare fali saída mak buat foun mak sei hala’o,” dehan nia.
Governante ne’e nia mensajen ba funsionariu sira hare ida ne’ebe mak di’ak tau ba oin, no ida ne’ebe mak ladi’ak iha tinan 2022 hare husik tiha, hanesan ema dehan katak ai-fuan ne’ebé di’ak kuidadu didi’ak ba no ida ne’ebe nia sanak maran ona ladun di’ak tesi soe tiha.
