Reportajen Joselina dos Santos
Domingos Gomes la deklara fontes nia identidade no lamenta ho Polisia Cientifika Investigasaun Criminal (PCIC) nia Karta Notifikasaun. Konsidera fó amiasa boot ba jornalista tanba karta ne’e la kumpri lei komunikasaun sosial nune’e sei hein submete ba tribunal.
Hafoin inkeritu, jornalista Domingos Gomes hatete, Karta ne’e PCIC haruka ba nia nudar indívidu tanba ne’e nia halo tuir saida mak sira hato’o, maibe tuir loloos karta ne’e hato’o ba redasaun liga ho notísia jornal Diariu independente nian.
“Pergunta ne’ebe PCIC husu ne’e liga ba publikasaun jornal independente ho notísia kona-ba kazu anterior nian, liu-liu atu esklarese kona-ba fonte importante ne’ebe ha’u hetan maibé ha’u hatan dehan labele tanba ne’e segredu jornalista sira nian no sei la deklara bainhira kazu ne’e ba oin”, dehan jornalista Domingos Gomes ba jornalista sira iha Edifisiu PCIC Kolmera, sexta 23/12.
Nune’e, PCIC nia karta ne’e refere ba individu Domingos Gomes to’o mai iha fatin ne’e, laos individu fali maibé liga fali ba obra notísia jornal independente nian. Loloos situasaun sira hanesan ne’e bolu jornal independente nia responsavel.
“Ha’u ne’e jornalista ne’ebe bain-bain halo kobertura iha tereinu maibé atu publika ka la publika ne’e desizaun redasaun nian, nune’e prosesu tuir mai ha’u sei ko’alia tuir saida mak sira ko’alia no haruka iha tribunal”, Domingos informa.
