Reportajen Umbelina dos Reis
Konsellu Ministru aprova ona projetu ba dekretu-Lei ne’ebé aprezenta husi Vise-Ministra Solidariedade Sosial no Inkluzaun (MSSI), Signi Chandrawati Verdial ba kriasaun apoiu pontuál ba vulneravel sira.
Diploma ida ne’e ho objetivu atu apoiu sira ne’ebé atribui husi estadu ba indivíduu, no família sira iha situasaun estrema vulnerabilidade sosiál, hodi garante satisfasaun ba nesesidade bázika durante prosesu reinsersaun sosiál nian.
Ministru Prezidensiál du Konsellu Ministru, Fidelis Leite Magalhães hatete, apoiu ne’e sei atribui pontualmente ba individu no família sira ne’ebé hasoru situasaun estrema vulnerabilidade temporáriu ho forma hanesan beins alimentár no beins naun alimentar husi nesesidade báziku ba uza pesoál, beins husi nesesidade báziku ba uzu doméstiku, apoiu pekuniáriu no apoiu psikososiál.
Tipu apoiu públiku ne’ebé atribui no ni-nia montante depende ba avaliasaun husi situasaun vulnerabilidade sosial husi profisionál departamentu governamental, responsavel husi asisténsia sosiál nian. Montante ba apoiu pekuniáriu ne’e labele liu husi dolar amerikanu $500, eseptu iha situasaun sira translasaun ba mate-isin sira ho montante másimu ne’ebé fiksa ona ho dolar amerikanu $5,000.
Alein de ne’e, Ministru Fidelis informa, aprova mós projetu Proposta Rezolusaun Parlamentu Nasionál nian, ne’ebé aprezenta husi Primeiru Ministru, Taur Matan Ruak, ba dezignasaun husi Komisáriu Komisaun Anti-Korrupsaun, ba mandatu tinan haat, tuir rejime eskluzividade.
Tuir lejizlasaun iha vigór, Parlamentu Nasionál sei analiza no vota ba naran ne’ebé hato’o husi Governu, maske ni-nia dezignasaun sei nesesária ba maioria absoluta husi deputadu reprezentante sira ne’ebé prezente, pelu menus, baluk tolu husi deputadu sira ne’ebé efetividade iha funsaun sira.
