Reportajen Joanina Casamiro
Eskola Filiar Báziku, (EFB) harii iha tinan 1984 iha suku Kamea, Postu Administrativu Cristu Rei, kondisaun eskola hahu aat, maibé governuf foti inisiativa hodi reabilita nune’e Koordenadora Eskola husu ba Ministru Edukasaun Juventude no Desportu (MEJD), hodi bele halo reabilitasaun ba eskola ne’e
Banhira Neon Metin halo entrevista ho Koordenadora Eskola Filiar Báziku 1 no 2 Kamea Rai-hun, Agostinha de Fatima Gusmão hateten, eskola ne’e harii iha 1984, maibé seidauk hetan reabilitasaun ruma hosi Ministru Edukasaun rasik to’o ohin loron, Eskola nia kondisaun sira ladún di’ak no komesa nakfera hotu ona.
Maski Ministru Edukasaun no nia Vise Ministru MEJD mai vizita ona eskola ne’e, maibé eskola ne’e seidauk hadi’a nafatin. Tanba iha eskola ne’e, bainhira tempu udan no rai nakdoko bele fó ameasa ba eskola no estudante sira.
“Ami nia hakarak eskola ne’e atu hadiak foun, tanba eskola ne’e harii ona iha 1984, tanba eskola harii kleur ona, ne’ebé semente sira komesa aat hotu ona, depois ami mós tauk karik udan bo’ot ou rai nakdoko fo impaktu ba eskola, bele akontese mós eskola monu bele hanehan estudante oan sira,” Dehan Koordenadora eskola EFB Kamea Agostinha ba Neon Metin iha nia seervisu fatin, kinta 2/02.
Nia haktuir, maski edifisiu eskola ne’e haree husi dook diak hela, maibe kuandu mai besik maka haree eskola nia kondisaun iha laran ne’e aat hotu. Ho ida ne’e Koordenadora eskola ne’e rekomenda ba iha parte relevante sira atu bele tau matan ba eskola ne’e.
“Husu ba Ministeriu Edukasaun atu bele tau matan mós ba ami nia eskola ne’e komesa semente aat hotu ona, kada periodu ami sempre hola semente no rai henek sira, hodi taka hela de’it ba iha aula sira ne’ebe nakfera ona”, nia husu.
