Reportajen Silvino Freitas
Sekretária Estadu Formasaun Professionál no Empregu (SEFOPE), kria ona lei seguransa traballadór nian, no aprezenta ona ba Konsellu Ministru (KM), hodi proteje traballadór sira no mós emprezáriu sira fo responsabilidade bainhira hetan asidente.
Tuir SEFOPE Alarico do Rosario, lei ne’e atu próteze traballadór sira ne’ebé hetan asidente iha kna’ar fatin, bainhira hala’o servisu.
“Ita nia traballadór timoroan karik sira hetan asidente iha servisu fatin maka liman no ain tohar, kualker buat ruma kona iha sira nia servisu fatin, tanba ne’e ami halo lei ne’e atu proteje sira” dehan Alarico hafoin reuniaun Konsellu Ministro,(08/02).
Nia dehan, lei ne’e importante tebes ba traballadór, hodi asegura sira bainhira hetan asidente ruma bele toma responsabilidade husi emprezariu sira.
“Lei ne’e vale ba timoroan sira ne’ebé hala’o servisu iha teritório nasionál, iha estranjeiru ema iha lei para atu asegura” nia esplika.
Alarico haktuir, lei ne’e elabora hetan konsensu husi emprezáriu no sindikatu traballadór sira hamutuk ho governu liuhusi konsellu nasionál artbirtrajen no konsellu nasionál traballu.
