Komunidade Fo Rai Gratuita 66 Hektares Harii Sidade Universitáriu Iha Aileu, MESSK: Informasaun La Los

Reportajen David Da Costa

Komunidade uma kain 29 ihaBairo Mantane iha suku Bandodatu, Postu Administrativu Aileu Vila, Munisipiu Aileu, fó rai gratuita iha Mausadu iha Suco Bandudato, Lau-Usi no Lahae, ho luan 66 hektares ba iha Ministériu Ensinu Superiór Siénsia no Kultura (MESSK),  atu harii Sidade Univesitariu, maibé MESSK konsidera informasaun ne’e la loos.

Ministru Ensinu Superiór Siénsia no Kultura (MESSK), Longuinhos dos Santos, hateten komunidade entrega rai gratutia iha Mausadu iha Suco Bandudato, Lau-Usi no Lahae, ho luan 66 haktares, sem kompensasaun ne’e informasaun la loos, tanba ne’e MESSK sei la repete tan informasaun.

“66 hektares ne’e ha’u hanoin informasaun la loos. Problema ne’e ha’u informa tiha ona desde inisiu, ne’ebé hau labele repete inforsasun ba ita boot,” dehan Ministru Longuinhos  hafoin remata reuniaun Ordináriu Konsellu Ministrus iha Palásiu Governu, Kuarta 1/03.

Governante ne’e haktuir, governu iha komitmentu atu harii sidade universitáriu  ba se de’it, tanba projetu ida ne’e, iha alterasaun ba planu estratéjia dezenvolvimentu Nasionál 2023 to’o 2030.

Antes ne’e liu husi konferensia imprensa portavoz  komunidade afetadu harii Sidade Universitáriu Aileu, Egas Andre Alves Mesquita, hateten, atu harii Sidade Universtáriu Iha Aileu komunidade iha Mantane ne’e oferese rai gratuita ba iha MESSK, maibé tanba sa maka estadu tenke mai foti komunidade nia rai ida no fó tan kompensasaun nusa lakoi ba halo iha rai ne’ebé fó gratuita ne’e. Tanba rai ne’ebé oferese gratuita ne’e iha tempu   Portugues nian halo ona eskola iha ne’ebá.

“Ami husu mos ba Ministeriu Ensinu Superior lqatu Konsidera no bele tetu hikas opsaun ne’ebe komunidade fó hodi hili rai seluk iha Mausadu iha Suco Bandudato, Lau-Usi no Lahae, ho luan hektares 66. Fatin ida ne’e mós governu tempo portugues harii escola iha ne’eba no komunidade sira oferese fatin ida ne’e ho gratuita sem kompensasaun,” dehan portavoz  Egas Andre Alves Mesquita, liuhusi konferensia Imprensa, iha Mantane Aileu, Sexta 17/02.

Komunidade konsidera Governo seidauk halo estudu viabilidade atu realoka komunidade afeitadu sira antes halo ona kompensasaun ne’e. Nune’e mós Governu la fó rekonhesementu legal ba komunidade rai nain atu hetan asesu ba programa Uma Kbiit Laek tanba kosidera rai ne’e sei disputa hela no atu hari sidade universitáriu.

Tanba ne’e komunidade sira  ezije ba entidade benefisiáriu sira liu-liu Ministériu Justica liu husi Diresaun Nasional Terras e Propriedade no Ministériu Ensinu Superior atu halo tuir prosedimentu sira ne’ebe hakerek ho klaru ona iha Lei Nu 8/2017 kona ba Espropriasaun Tanba Utilidade Publiku. Lei ida ne’e hakerek klaru tenke halo konsultasaun klean tha implementasaun kuelker projeitu ne’ebé sei foti komunidade nia rai.

“Ami komunidade husi Aileu-Mantane kompostu husi uma kain 29, total populasaun 131, rejeita governu atu foti ami nia rai hektares 16 atu hariii sidade universitáriu iha Aileu,”  nia deklara.