Reportajen David da Costa
Governu liuhusi reuniaun Konsellu Ministru (KM) aprova ona projetu Dekretu-Lei, ne’ebé aprezenta husi Ministru Turizmu Komérsiu no Indústria (MTKI), José Lucas do Carmo, kona-ba Autoridade Turizmu Timor-Leste, I.P. No ne’e sei responsavel ba matéria ne’ebé relasiona ho regulasaun, promosaun no marketing, valorizasaun ambiente negósiu no sustentabilidade turizmu nian.
Porta Voz Governu, Ministru Prezidénsia Konsellu Ministru Interenu, Atual Ministru Koordenadór Asuntu Ekonomia (MKAE), Joaquim Amaral, hateten, Autoridade ne’e sei iha kompeténsia regulatória iha matéria turístika ne’ebé dezenvolve husi entidade públika no privada sira.
“Autoridade Turizmu ne’e husi tutela husi membru Governu ne’ebé responsavel iha área turizmu nian no sei iha misaun atu promove, kapasita, koordena, akompaña no dezenvolve setór privadu no públiku, hodi kontribui ba promosaun no fortalesimentu turizmu nian ba dezenvolvimentu ekonómiku iha país ne’e,” dehan Ministru Prezidénsia Konsellu Ministru Interenu, Atual MKAE, Joaquim Amaral, iha Palásiu Governu, kuarta 29/03.
Nia haktuir sei responsavel mós atu kualifika no dezenvolve infraestrutura turístika, dezenvolve kualifikasaun no formasaun rekursus umanus nian, apoia ba investimentu iha setór turístiku, promove kriasaun koñesimentu kona-ba setór ne’e no koordena promosaun interna no externa Timor-Leste nian nu’udar destinu turístiku.
