Reportajen David da Costa
Governu liuhusi reuniaun Konsellu Ministru (KM) aprova ona projetu proposta Lei kona-ba rejime kontratasaun pesoál, hodi apoiu atividade adezaun Timor-Leste nian ba Asosiasaun de Nasoens do Sudeste Aziátiku (ASEAN).
Iha projetu Dekretu-Lei, kona-ba rejime kontratasaun pesoál hodi apoiu atividade adezaun Timor-Leste nian ba ASEAN, aprezenta husi Vise Ministériu Negósius Estranjeirus no Kooperasaun (MNEK), Julião da Silva.
Porta Voz Governu, Ministru Prezidénsia Konsellu Ministru Interinu, atuál Ministeriu Koordenadór Asuntu Ekonomia (MKAE), Joaquim Amaral hateten, Rejime kontratasaun ida-ne’e aplika ba traballadór administrasaun públika ne’ebé kontrata hodi hala’o atividade sira ne’ebé relasiona ho adezaun Timor-Leste nian ba ASEAN.
“Prosesu kontratasaun ne’e sei hala’o bazeia ba prinsípiu legalidade transparénsia selesaun tuir méritu, imparsialidade, ho hanoin-di’ak, liberdade kandidatura no kondisaun no oportunidade ne’ebé hanesan,” dehan Ministru Prezidénsia Konsellu Ministru Interinu, atuál MKAE, Joaquim Amaral, iha Palásiu Governu, kuarta 29/03.
Tanba ne’e diploma ne’e prevee kriasaun ba komisaun téknika ida, liuhusi Rezolusaun Governu nian, ne’ebé sei konta ho reprezentante husi liña ministeriál relevante sira ne’ebé sei responsavel ba levantamentu nesesidade, determinasaun númeru vaga no funsaun, kompeténsia, abilitasaun sira ne’ebé presiza.
Nune’e Kontratadu hirak ne’e tenke iha abilitasaun akadémika mínima lisensiatura no sei klasifika iha kategoria rua tuir abilitasaun akadémika no esperiénsia profisionál.
“Inskrisaun sei hala’o liuhusi dalan eletróniku no prosesu seletivu inklui ezame eskritu eletróniku, ezame koñesimentu, ezame diskursivu no entrevista,” nia esplika.
