Home Notisia Staff Protokolu PA RAEOA Ameasa Baku no Impede Serbisu Jornalista Tatoli

Staff Protokolu PA RAEOA Ameasa Baku no Impede Serbisu Jornalista Tatoli

1262
0
(Foto: IFEX)

Staff ekipa hosi protokolu Presidente Autoridade RAEOA nian impede serbisu jornalista Tatoli, Abilio Eli Nini iha eventu lansamentu muzeu tais iha Oecusse, horiseik (4/06). Prezidente AJTL, Zevonia Vieira konsidera asaun protokolu ne’e viola Lei Komunikasaun Sosial.

“Hau tur iha oin ho kamera atu hasai foto eventu nian. Iha hau nia kotuk ne’e videographer sira hosi GMN ho RTTL nian. Protokolu mai avizu dehan jornalista sira atu dook tiha. Mais hau dehan hau tur deit iha oin atu hasai foto. Entaun nia mai rasta hau nia faru to’o hau monu. Hau tara hela kartaun jornalista no lori kamera atu halo kobertura ba eventu”, Jornalista Tatoli, Abilio Eli-Nini haktuir.

Hafoin akontese iha salaun laran staff ekipa protokolu ne’e mos ameasa atu baku jornalisata Tatoli ne’e.

Neon Metin tenta konfirma akontesementu ne’e ho staff ekipa protokolu PA RAEOA nian, Aquito Roxaca Guterres. Nia rekoinese saida mak akontese iha sala laran maibe ida ikus mosu iha video ne’e nia konsidera settingan ka senariu ida.

“Iha batas ba jornaslista atu halo kobertura. Jornalista sira seluk kumpri maibe nia besik liu kadera Presidente nian. Hau dehan ba nia lalika besik liu, mai tan kotuk uituan maibe nia dehan nia hakarak besik atu hasai foto. Hau dada duni nia kamija mais depois eskoltu mai entaun hau mos para tiha”, Aquito Roxaca Moniz esplika via telefone ba Neon Metin, ohin (05/06).

Tuir Aquito saida mak ikus mai viral iha video ne’e nebe publika iha Facebook ne’e akontese hafoin de programa lansamentu no nia konsidera ida ne’e senariu ida ne’ebe jornalista sira prepara ona.

Bainhira rona akontesementu ne’e no haree video mak share iha Facebook, Prezidente AJTL, Zevonia Vieira halo reasaun diskontente hodi hatete katak aktu protokolu nian ne’e viola lei.

“Aktu protokolu ida dada jornalista too monu nee aktu ida impede ona jornalista nia atividade iha terrenu. Ema nebe halo atentadu tenke resposabiliza nia aktu krime nee, lei rekoinese  jornalista nia serbisu no proteze serbisu jornalista nian”, Presidente AJTL ne’e esplika via Whatsapp.

“Tuir lei jornalista iha direitu atu rekolla informasaun iha fatin publiku. Lansamentu Muzeu Tais nee iha Otel Oecusse neebe ema hotu bele asesu no liliu jornalista iha direitu asesu”, Zevonia aumenta.

Lei Komunikasaun Sosial Nu.5/2014, 19 de Novembru, iha Artigu 41.º Atentadu ba liberdade informasaun hatete katak sei deit mak impede serbisu jornalista nian “sei hetan pena-prizaun to’o tinan-rua ka multa bainhira impede asesu livre jornalista nian iha fatin públiku ka ekipa órgaun imprensa nian. Lei ne’e kondena aktu sira ne’ebé perturba, impede hamosu ka hamenus kapasidade hodi hala’o atividade jornalístika nian haktuir lei ida-ne’e.

Aktu protokolu PA RAEOA nian ne’e halo iha fatin eventu Lansamentu Muzeu Tais ne’ebe asista hosi Presidente da Republika, Jose Ramos Horta no mos Presidente RAEOA, Rogerio Lobato.

Print Friendly, PDF & Email

LEAVE A REPLY

Please enter your comment!
Please enter your name here