Reportajen Joselina dos Santos
Xefe Redasaun Média Hatutan.com, Francisco Belo garantia katak iha ámbitu kampaña eleitorál eleisaun parlamentár 2023, sei publika informasaun sira ne’ebé bazeia ba programa partidu politiku nian, no laos ajitasaun ne’ebé insulta malu hodi hetan konfiansa husi povu.
“Ami sei publika informasaun kona-ba programa partidu politikus sira nian, maibé ami sei la publika sira nia ajitasaun ne’ebé sira halo hodi manan konfiansa husi povu hodi atake malu”, dehan Xefe Redasaun Média Hatutan.com Francisco Belo iha Salaun KI, Kintal-Boot, 17/04.
Xefe Redasaun Média Hatutan.com Francisco Belo haktuir, sira garante katak sei la publika informasaun sira ne’ebé maka insulta malu pessoal, sei la publika deklarasaun ne’ebé hamosu rasista no sei la publika deklarasaun ne’ebé opende ba pesoal nian, tanba iha pesoal singular, pesoal plural no pesoal koletiva. Hatutan sei publika notisia ne’ebé bazeia ba interese publiku.
“Esperiénsia hatudu ona katak iha eleisaun dezde primeiru to’o ohin loron buat ne’ebé akontese barak maka média sira terjebak ho programa politiku sira ne’e, dala ruma ita halai tama tiha ba politika sira jogada hodi fó informasaun ne’ebé tuir loloos la pertense ba interese publiku, maibé interese ba partidu politikus atu bele manan ukun”, nia dehan.
Tanba ne’e hatutan.com lakohi lori esperensia ida ne’e, atu hatutan tan ba oin, maibé hatutan hakarak mantein nia independensia no kumpri kódigu étiku jornalistiku nian.
