Reportajen Joselina dos Santos
Asossiasaun Jornalista Timor Lorosa’e (AJTL), servisu hamutuk ho Konsellu Imprensa (KI) realiza Editor Club ho tema “Independensia Jornalizmu iha Kontestu Kobertura no Publikasaun Kanál Mídia nian iha Ambitu Kampaña Politika Eleisaun Lejislativa” ba Xefe Redasaun no jornalista sira atu fó informasaun ne’ebé loos no kredivel ba públiku.
Iha diskursu, Prezidente AJTL, Zevonia Vieira hateten AJTL hanesan Asosiasaun ne’ebe maka kontinua luta, hodi promove liberdade imprensa no liberdade espresaun, halo advokasia ba konaba prinsípiu jurnalismu nian, no kapasita nia membru sira liga ho mundu jornalizmu no tékniku profisional sira ne’ebe eziste iha Timor-Leste.
Nune’e nia dehan AJTL serbisu hamutuk ho Konsellu Imprensa kontinua organiza editor club ne’ebe liga liu ba independénsia Editorial, kona-ba Media no jornalista sira atu asegura informasaun ho loloos ho kredivel ba sidadaun sira iha ámbitu kampaña eleitorál no eleisaun nian”.
“Ita hatene eleisaun parlamentár besik ona, no bainrua sei hala’o kampaña eleitorál, tanba ne’e ami kontinua halo diskusaun ho Konsellu Imprensa, Xefe Redasaun sira haree kona-ba independénsia editorial iha idak-idak nia redasaun, tanba importante tebes oinsa fó informasaun ne’ebe loloos no la halis ba grupu ka partidu balun, maibé oinsá bele lori lian povu nian, liga ho promesas partidu polítiku nian”, dehan Prezidente AJTL iha Salaun KI, Kintal-Boot, Segunda 17/04.
Prezidente AJTL husu ba jornalista sira ne’ebe halo kobertura ba eleisaun parlamentár, atu kontra nafatin liafuan rasizmu, liafuan odiu no hodi promove jornalizmu ba paz, halo klarifikasaun antes halo publikasaun iha ida-idak nia media, importante tebes tanba iha ámbitu eleisaun parlamentár ne’e atu ajuda fó sai informasaun loos ne’ebé kontribui ba prinsípiu jornalizmu nian.
Iha Fatin hanesan, Dirertór Ezekutivu Konsellu Imprensa (KI), Rigoberto Monteiro mós haktuir KI servisu hamutuk Asosiasaun hanesan AJTL, TLPU no UPJTL hodi halo kapasitasaun kompeténsia jornalista sira nian, no halo polítika ka lejizlasaun ne’ebe presiza halo hamutuk. Aleinde ne’e mos halo advokasia estratéjiku, atu manan loron 16 Outubru sai nu’udar loron nasionál ba liberdade imprensa.
“Ita presiza halo advokasia hamutuk iha asuntu sira ne’ebe mais prinsipál ba atividade jornalistika nian, ita nia luta tenke konjuntu hamutuk, atu nune’e ita forte hodi halo asuntu advokasia ba liberdade imprensa no liberdade espresaun”, dehan Diretór ezekutivu KI.
